Epaper
బెంగళూరులో అద్దె ఇల్లు దొరకడం ఎంత కష్టమో చాలామందికి తెలిసే ఉంటుంది. ఏడాది అద్దెను అడ్వాన్స్ గా ఇవ్వడం మాట అటుంచి, ఇల్లు ఇవ్వాలంటే ఏకంగా ఇంటర్వ్యూలు కూడా ఎదుర్కోవాల్సి రావడం బాధాకరం. కొంతమంది ఓనర్లు ఇంటర్మీడియట్ సర్టిఫికేట్లు, ఫామ్-16లు కూడా అడుగుతున్న పరిస్థితి.
బ్యాచిలర్స్ కు ఇల్లు దొరకడం అతి కష్టంగా మారిన ఇలాంటి పరిస్థితుల్లో సహజీవనం చేస్తున్న జంటలకు ఇల్లు దొరకడం దాదాపు దుర్లభం. అందుకే ఓ స్టార్టప్ వ్యాపారవేత్త వినూత్నంగా ఆలోచించాడు. బెంగళూరులో ఓ ప్రాపర్టీ కొనుగోలు చేసిన ఈ బిజినెస్ మే, తన ఇంటిని సహజీవనం చేసే జంటలకు ఇచ్చేందుకు ముందుకొచ్చాడు.
ఓ స్టార్టప్ కంపెనీ వ్యవస్థాపకుడు ప్రియమ్ సరస్వత్, బెంగళూరులోని హెచ్ఎస్ఆర్ లే-అవుట్ కు సమీపంలో ఇల్లు కొనుగోలు చేశాడు. దాన్ని బ్యాచిలర్స్ లేదా సహజీవనం చేస్తున్న జంటలకు అద్దెకు ఇస్తానని ప్రకటించాడు.
సమాజానికి ఎంతో కొంత తిరిగి ఇవ్వడంతో భాగంగా.. అద్దె ఇల్లులు దొరక్క ఇబ్బందులు పడుతున్న బ్యాచిలర్స్, లివ్-ఇన్ కపుల్ కోసం తను ఈ నిర్ణయం తీసుకున్నట్టు వెల్లడించాడు.
కరోనా తర్వాత బెంగళూరులో అద్దెలు మరింత పెరిగిపోయాయి. బ్యాచిలర్స్ కు ఇల్లు దొరకడం దుర్లభంగా మారిన నేపథ్యంలో.. ప్రియమ్ తీసుకున్న నిర్ణయం బాగుందంటూ నెటిజన్లు మెచ్చుకుంటున్నారు.