Epaper
‘మా’ ఎన్నికల్లో మంచు విష్ణు ప్యాన‌ల్ గెలుపు… ఏపీ అధికార పార్టీ వైసీపీలో జోష్ నింపింది. ముఖ్యంగా మంచు విష్ణు గెలుపు కంటే, ప్ర‌కాశ్‌రాజ్‌ను బ‌రిలో నింపిన మెగాబ్ర‌ద‌ర్స్ ఓట‌మి ఎక్కువ ఆనందాన్ని ఇస్తోంద‌నే అభిప్రాయాలు వెల్లువెత్తుతున్నాయి.
ఇటీవ‌ల రిప‌బ్లిక్ సినిమా వేడుక‌లో త‌మ అధినేత, ముఖ్య‌మంత్రి వైఎస్ జ‌గ‌న్‌పై జ‌న‌సేనాని పవన్కల్యాణ్ అవాకులు చెవాకులు పేలార‌నే ఆగ్ర‌హం వైసీపీలో బ‌లంగా ఉంది.
ఈ నేప‌థ్యంలో ‘మా’ ఎన్నికల్లో ప్ర‌కాశ్‌రాజ్‌కు మెగా బ్ర‌ద‌ర్స్ మ‌ద్ద‌తు ప‌ల‌క‌డం తెలిసిందే. దీంతో ప్ర‌కాశ్‌రాజ్‌ను ఓడించ‌డం ద్వారా చిత్ర‌ప‌రిశ్ర‌మ‌లో పవన్కల్యాణ్, ఆయ‌న కుటుంబానికి బ‌లం లేద‌ని నిరూపించిన‌ట్టు అవుతుంద‌నే భావ‌న వైసీపీలో ఉండింది.
అంతేకాదు, ప్ర‌కాశ్‌రాజ్ ప్ర‌ధాన ప్ర‌త్య‌ర్థి మంచు విష్ణు త‌మ అధినేత‌కు స‌మీప బంధువు కావ‌డం కూడా క‌లిసొచ్చింది. గ‌త సార్వ‌త్రిక ఎన్నికల్లో మంచు మోహ‌న్‌బాబు వైసీపీ త‌ర‌పున విస్తృతంగా ప్ర‌చారం నిర్వ‌హించిన సంగ‌తి తెలిసిందే.
దీంతో మంచు విష్ణు గెలిస్తే చిత్ర‌ప‌రిశ్ర‌మ‌లో త‌మ ప‌ట్టు వుంటుంద‌ని వైసీపీ భావించింది. ఇప్పుడు అదే జ‌రిగింది. ఒక్క దెబ్బ‌కు రెండు పిట్ట‌ల‌న్న చందంగా ప్ర‌కాశ్‌రాజ్ ఓడిపోవ‌డంతో ప‌వ‌న్‌క‌ల్యాణ్‌కు అంత సీన్ లేద‌ని నిరూపించ‌డం, అలాగే టాలీవుడ్‌పై ప‌ట్టు దొరికిన‌ట్టైంది.
మంచు విష్ణుకు సోష‌ల్ మీడియా వేదిక‌గా వైసీపీ శుభాకాంక్ష‌లు చెబుతోంది. ఈ సంద‌ర్భంగా జ‌గ‌న్ దంప‌తుల‌తో మంచు విష్ణు దంప‌తులు క‌లిసి దిగిన ఫొటో, అలాగే సీఎం జ‌గ‌న్‌తో మోహ‌న్‌బాబు, విష్ణు ఉన్న ఫొటోల‌ను షేర్ చేస్తూ శుభాకాంక్ష‌ల‌ను వెల్లువెత్తిస్తున్నారు.