Epaper
దేశవ్యాప్తంగా ఇనస్టాగ్రామ్ మొరాయించింది. వేలాది మంది తమ ఎకౌంట్స్ పనిచేయక ఇబ్బంది పడ్డారు. ఇనస్టాకు ఏదో అయిందంటూ ట్విట్టర్ లో ఎడతెగని పోస్టులు పడ్డాయి. అదే సమయంలో పుకార్లు ఊపందుకున్నాయి. ప్రపంచవ్యాప్తంగా పాపులర్ అయిన ఈ యాప్, హ్యాక్ అయిందంటూ కొందరు పుకార్లు పుట్టించారు.
అప్పటివరకు స్తబ్దుగా ఉన్న ఇనస్టాగ్రామ్, ఈ పుకార్లతో ఒక్కసారిగా అలెర్ట్ అయింది. తమ సోషల్ మీడియా ఫ్లాట్ ఫామ్ కు ఏం కాలేదని, కేవలం చిన్న సాంకేతిక సమస్య మాత్రమే తలెత్తిందని ప్రకటించింది. ఆ సమస్యను పరిష్కరించామని, ప్రస్తుతం ఇనస్టాగ్రామ్ యథావిధిగా పనిచేస్తోందని ప్రకటించింది.
డౌన్ డిటెక్టర్.కామ్ అంచనా ప్రకారం.. అమెరికా, బ్రిటన్, కెనడా దేశాల్లో ఇనస్టాగ్రామ్ అంతరాయాలు ఎక్కువగా కనిపించాయి. యూఎస్ లో దాదాపు లక్షమంది వరకు ఈ యాప్ బాధితులున్నారు. అటు కెనడాలో 24వేల మంది, బ్రిటన్ లో 56వేల మంది ఈ యాప్ ను వాడడంలో ఇబ్బందులు ఎదుర్కొన్నారు. ఇక ఇండియాలో అతి తక్కువగా 9500 మంది ఇనస్టా ఫీడ్ ను యాక్సెస్ చేయలేకపోయారు.
అంతర్జాతీయ కాలమానం ప్రకారం, ఉదయం 4 గంటలకు ఈ సమస్య తలెత్తిందని, ఆ వెంటనే సమస్యన పరిష్కరించామని, సదరు సంస్థ ప్రకటించింది. దీంతో ఇనస్టాగ్రామ్ హ్యాకింగ్ వదంతులకు చెక్ పడింది. మెటాకు చెందిన ఫేస్ బుక్ నుంచి గతంలో వినియోగదారుల సమాచారం భారీగా లీక్ అయింది. దీంతో ఇనస్టాగ్రామ్ పై పుకార్లు వచ్చాయి.