సాయి ధరమ్ కు ప్రమాదం

‘మెగా’ హీరో సాయిధరమ్‌ తేజ్‌ రోడ్డు ప్రమాదానికి గురయ్యారు. ఈ ఘటనలో సాయిధరమ్‌ తేజ్‌కు తీవ్రగాయాలు అయ్యాయి. ప్రమాదం జరిగిన వెంటనే సాయితేజ్‌ అపస్మారక స్థితిలో వెళ్లినట్లు తెలుస్తోంది.  

స్పోర్ట్స్‌ బైక్‌పై ప్రయాణిస్తున్న ఆయన ప్రమాదవశాత్తూ కిందపడిపోయారు. నగరంలోని కేబుల్‌ బ్రిడ్జ్‌ ప్రాంతంలో ఈ ప్రమాదం జరిగింది. 

హెల్మెట్‌ ఉన్నా, ప్రమాద తీవ్రత కారణంగా గాయాలు బలంగా తగిలాయి. ప్రమాదం జరిగిన వెంటనే దగ్గర్లోని మెడికవర్‌ ఆస్పత్రికి తరలించారు. ప్రాథమిక చికిత్స అనంతరం ఆయనను అపోలో ఆస్పత్రికి తరలించారు.

సాయితేజ్‌కు బైక్‌ రైడింగ్‌ ఇష్టం. షూటింగ్‌ లేని సమయంలో సరదాగా రైడింగ్‌కు వెళ్లటం అలవాటు. బైక్‌పై వెళ్లిన సాయిధరమ్‌ తేజ్‌ కేబుల్‌ బ్రిడ్జ్‌ సమీపంలోకి రాగానే  వేగాన్ని నియంత్రించలేక కింద పడిపోయారని తెలుస్తోంది.  

సాయిధరమ్‌ తేజ్‌ ఆరోగ్య పరిస్థితి బాగానే ఉందని, ఆయన కోలుకుంటున్నారని సన్నిహిత వర్గాలు తెలిపాయి.