ఉన్నట్టుండి వైరల్ అయిన దేవరకొండ

ఉన్నట్టుండి విజయ్ దేవరకొండ సోషల్ మీడియాలో ఒక్కసారిగా వైరల్ అయ్యాడు. దీనికి కారణం తాజా చిత్రం నుంచి అతడి లుక్ రివీల్ అవ్వడమే. ప్రస్తుతం ఇండస్ట్రీ మొత్తం లీకులతో సతమతమౌతోంది. విజయ్ దేవరకొండ సినిమా కూడా ఈ లిస్ట్ లోకి చేరింది.

గౌతమ్ తిన్ననూరి దర్శకత్వంలో ఓ సినిమా చేస్తున్నాడు విజయ్ దేవరకొండ. గ్యాంగ్ స్టర్ సెటప్ లో వస్తున్న ఈ మూవీలో అతడు గూఢచారిగా నటిస్తున్నాడు. ఈ పాత్ర కోసం అతడు మేకోవర్ అయ్యాడు. ఇప్పుడా లుక్ బయటకు వచ్చేసింది.

ఆశ్చర్యకరమైన విషయం ఏంటంటే.. యూనిట్ శ్రీలంకలో షూట్ చేస్తోంది. అక్కడ్నుంచి ఈ లుక్ లీకైంది. విజయ్ దేవరకొండ చాలా షార్ట్ హెయిర్ తో ఉన్నాడు. గడ్డం కూడా ట్రిమ్ చేశాడు. ఇప్పటివరకు అతడు ఏ సినిమాలో కనిపించని లుక్ ఇది.

లుక్ లీకైన వెంటనే యూనిట్ చర్యలకు దిగింది. సోషల్ మీడియా నుంచి వెంటనే వాటిని తొలిగించే ప్రయత్నం చేసింది. కానీ గమ్మత్తుగా అంతలోనే మరో స్టిల్ లీకైంది.

ఈ సినిమా నుంచి ఇది కేవలం ఒక లుక్ మాత్రమే. ఇలాంటివి మరికొన్ని లుక్స్ కూడా ఉన్నాయి. సితార ఎంటర్ టైన్ మెంట్స్ బ్యానర్ పై తెరకెక్కుతున్న ఈ సినిమాకు ఇంకా టైటిల్ పెట్టలేదు.