ఇలా గెంతులు వేస్తే పరువు పోదా సారూ

వైఎస్సార్ సీపీ ప్రభుత్వ కాలంలో ముఖ్యమంత్రి జగన్మోహన్ రెడ్డికి చాలా సన్నిహితంగా మెలగిన అధికారుల్లో ఐఏఎస్ ప్రవీణ్ ప్రకాష్ కూడా ఒకరు. సహజంగానే తెలుగుదేశం ప్రభుత్వం ఏర్పడిన తర్వాత ఆయనను పక్కన పెట్టింది. ఈ ప్రభుత్వంతో తనకు పొసగదనే అభిప్రాయంతోనే ఉన్న ఆయన కూడా ఇంకా తనకు ఏడేళ్ల సర్వీసు మిగిలి ఉన్నప్పటికీ.. వీఆర్ఎస్ కు దరఖాస్తు చేసుకున్నారు. వెంటనే సీఎస్ నీరబ్ కుమార్ దానిని ఆమోదించడం కూడా జరిగింది.

సెప్టెంబరు 30 నుంచి అది అమల్లోకి వస్తుంది కూడా. అయితే ఇప్పుడు ప్రవీణ్ ప్రకాష్ తనను మళ్లీ సర్వీసులోకి తీసుకోవాలని కోరుతూ ప్రభుత్వం చుట్టూ తిరుగుతున్నారు. దరఖాస్తు కూడా చేసుకున్నారు. ఆయనకున్న ట్రాక్ రికార్డు పరంగా చూస్తే, ఆయన కోరిక నెరవేరడం అసాధ్యం అని అంతా అనుకుంటుండగా.. ఇలా రాజీనామా, తర్వాత మళ్లీ చేరడానికి వేడికోలు వంటి గంతులు వేయడం ద్వారా ఆయన పరువు పోతుంది కదా అని ప్రజలు అనుకుంటున్నారు.

ఏపీలోని టీచర్ల ఎదుట ప్రవీణ్ ప్రకాష్ పేరెత్తితే చాలు మండిపడతారు. ఆ రేంజిలో కీర్తిప్రతిష్టలను ఆయన మూటగట్టుకున్నారు. జగన్మోహన్ రెడ్డి తీసుకున్న అనేక వివాదాస్పద నిర్ణయాల్లో ఆయన పాత్ర ఉన్నదనే ప్రచారం ఉంది. కేవలం వివాదాస్పద అధికారిగా ఉండడం మాత్రమే కాదు.. టీచర్లను చాలా చులకనగా చూడడం ద్వారా కూడా ఆయన చెడ్డపేరు తెచ్చుకున్నారు.

ఇవన్నీ ఒక ఎత్తు అయితే.. హిందీ సినిమా పాటలకు పార్కుల్లో డ్యాన్సులు వేస్తూ రీల్స్ చేసి ఇన్ స్టా ఖాతాలో పెట్టడం లాంటి పనులు కూడా చేసి, ఐఏఎస్ అధికారిగా ఆయన హోదాకు తగని ఆటలు ఆడారు.

ఎన్నికలకు ముందు.. జగన్ పార్టీ ఓడిపోయి తెదేపా గెలిస్తే సర్వీసులో కొనసాగలేనని ఆయన అన్న వ్యాఖ్యలు కూడా ఫలితాలు తర్వత వెలుగులోకి వచ్చాయి. ఇన్ని ట్విస్టుల మధ్య ఇక ఈ ప్రభుత్వం తనను లూప్ లైన్లోనే ఉంచేస్తుందనే నమ్మకంతోనే ఆన వీఆర్ఎస్ తీసుకున్నారు. తీరా ఏం జరిగిందో ఏమో.. మళ్లీ సర్వీసులోకి తీసుకోమంటూ ప్రభుత్వానికి దరఖాస్తు చేసుకున్నారు. అయితే ప్రభుత్వం మాత్రం అందుకు అనుమతించే ఉద్దేశంతో లేనట్టు తెలుస్తోంది.

ఆయన ఇలా తిరిగి అప్లయి చేసుకోవడం ద్వారా తన పరువు తానే తీసుకున్నారని కూడా పలువురు అంటున్నారు. చంద్రబాబు ప్రభుత్వం అనుమతించదని తెలిసినా అడగడం పరువుచేటు కదా అని వ్యాఖ్యానిస్తున్నారు.