Epaper
కొంద‌రి గురించి కొన్ని మాట‌లు వింటే న‌వ్వు ఆపుకోలేం. మ‌రీ ముఖ్యంగా రాజ‌కీయ రంగంలో కేఏ పాల్‌, లోకేశ్ ఎంతో ప్ర‌త్యేకం. అదేంటో గానీ వారు మాట్లాడినా, వాళ్ల గురించి మాట్లాడినా భ‌లే కామెడీగా వుంటుంది. అస‌లే హాట్‌హాట్‌గా సాగే రాజ‌కీయాల్లో ఇలాంటి క్యారెక్ట‌ర్లు లేక‌పోతే మ‌జా ఉండ‌ద‌నే అభిప్రాయాలు లేక‌పోలేదు.
తాజాగా ఓ కుటుంబాన్ని ప‌రామ‌ర్శించేందుకు వెళ్లిన నారా లోకేశ్‌ను పోలీసులు అడ్డగించ‌డం, ఆ త‌ర్వాత ప‌రిణామాలు ఆస‌క్తి క‌లిగిస్తున్నాయి. మ‌రీ ముఖ్యంగా నారా లోకేశ్ గురించి టీడీపీ సీనియ‌ర్ నేత సోమిరెడ్డి చంద్ర‌మోహ‌న్‌రెడ్డి త‌మాషాగా అన్నారో, లేక సీరియ‌స్‌గానో తెలియ‌దు.
సోమిరెడ్డి మాట‌లు విన్న వాళ్లు మాత్ర‌మే మ‌రీ లోకేశ్‌ను ఇంత అవ‌హేళ‌న చేయాలా? అని స‌ర‌దాగా అంటున్నారు. లోకేశ్‌ను చూసి జ‌గ‌న్ ప్ర‌భుత్వం భ‌య‌ప‌డుతోంద‌ని సోమిరెడ్డి చంద్ర‌మోహ‌న్‌రెడ్డి అనడం గ‌మ‌నార్హం. అందువ‌ల్లే గుంటూరు జిల్లా పోలీసులు ఆయ‌న్ని అదుపులోకి తీసుకున్నార‌ని సోమిరెడ్డి మండిప‌డ్డారు.
లోకేశ్‌ను చూసి జ‌గ‌న్ ప్ర‌భుత్వం భ‌య‌ప‌డుతుంద‌నే సోమిరెడ్డి మాట‌కంటే కామెడీ ఏదైనా ఉందా? అని నెటిజ‌న్లు స‌ర‌దా కామెంట్స్ చేస్తున్నారు. ఏదో ర‌కంగా లోకేశ్‌ను ప్ర‌జాక్షేత్రంలోకి తీసుకెళ్లాల‌ని టీడీపీ నాయ‌కులు త‌మ యువ‌నాయ‌కుడికి ఇలాంటి బుజ్జ గింపు, ఊర‌డింపు మాట‌ల‌తో మున‌గ చెట్టు ఎక్కిస్తున్నార‌ని నెటిజ‌న్లు అంటున్నారు.
మ‌రో మాజీ ఎమ్మెల్యే ధూళిపాళ్ల న‌రేంద్ర మ‌రింత ముందుకెళ్లి… ప్ర‌భుత్వ వైఫ‌ల్యాలు బ‌య‌ట ప‌డ‌తాయ‌నే కార‌ణంతో లోకేశ్‌ను అక్ర‌మ అరెస్ట్ చేశార‌న్నారు. లోకేశ్ ఒక్క రోజు బ‌య‌టికొస్తేనే టీడీపీ నేత‌లు, శ్రేణులు ఇంత‌గా హంగామా చేస్తున్నారే, ఇదే ప‌ని రోజూ చేస్తే ప‌రిస్థితి ఏంద‌ని నెటిజ‌న్లు సెటైర్స్ విసురుతున్నారు.
ఎక్క‌డైనా శ్రేణుల్ని నాయ‌కుడు ఉత్తేజ ప‌ర‌చ‌డం చూశాం. అదేంటో గానీ, టీడీపీలో మాత్రం రివ‌ర్స్‌. యువ నాయ‌కుడిని ఉత్తేజ ప‌రిచేందుకు ఎన్నెన్ని అతిశ‌యోక్తులో! మొత్తానికి లోకేశ్ గురించి విన‌లేక చ‌స్తున్నాం బాబు అనే వాళ్లే ఎక్కువ.