దిల్ రాజు చెప్పరు.. యూనిట్ తో చెప్పిస్తారు

గేమ్ ఛేంజర్ విషయంలో కూడా దిల్ రాజు ఇలానే వ్యవహరించాడు. తను చెప్పాలనుకున్న విషయాన్ని కొంతమంది మీడియా వ్యక్తుల ద్వారా, మ్యూజిక్ డైరక్టర్ తమన్ ద్వారా చెప్పించారు. ఆ తర్వాత అధికారికంగా వెల్లడించారు.

ఇదంతా తెలిసి చేస్తున్నారో, తెలియక చేస్తున్నారో మనకు తెలియదు కానీ, ఇప్పుడు వెంకీ-అనీల్ రావిపూడి సినిమాకు కూడా దిల్ రాజు ఇదే పద్ధతి ఫాలో అవుతున్నట్టు కనిపిస్తోంది.

సంక్రాంతికి గేమ్ ఛేంజర్ ఆల్రెడీ లైన్లో ఉంది. డేట్ కూడా ప్రకటించేశారు. మరి ఇదే నిర్మాతకు చెందిన వెంకటేశ్ సినిమా సంగతేంటి? దీన్ని సంక్రాంతికే తీసుకొస్తామంటూ ప్రారంభం నుంచి చెబుతున్నారు కదా.

ఇప్పుడు గేమ్ ఛేంజర్ మీదకు పోటీగా తనే నిర్మిస్తున్న వెంకీ సినిమాను రిలీజ్ చేస్తారా? దీనిపై కొన్ని రోజులుగా చర్చ నడుస్తోంది. సంక్రాంతి సీజన్ కు ఎలాగూ 3 పెద్ద సినిమాల్ని భరించే సత్తా ఉంది కాబట్టి వెంకీ-అనీల్ రావిపూడి సినిమా కూడా వస్తుందనేది చాలామంది మాట.

మరి అదే మాట దిల్ రాజు చెప్పొచ్చు కదా. ఆయన మాత్రం చెప్పరు. ఎప్పట్లానే తన యూనిట్ సభ్యులతో చెప్పిస్తున్నారు.

వెంకటేశ్-అనీల్ రావిపూడి సినిమా 90శాతం షూటింగ్ పూర్తయింది, డబ్బింగ్ మొదలైంది. ఇటు హీరో వెంకటేశ్, అటు దర్శకుడు అనీల్ రావిపూడి ఇదే విషయాన్ని చెబుతూ.. సంక్రాంతికి కలుద్దామంటూ ట్వీట్స్ వేశారు. కానీ దిల్ రాజు బ్యానర్ నుంచి మాత్రం సంక్రాంతి రిలీజ్ అని చెప్పలేదు.

90 శాతం షూటింగ్ పూర్తయింది, పోస్ట్ ప్రొడక్షన్ మొదలైందని మాత్రమే చెప్పారు. సంక్రాంతికి కలుద్దామనే మాట అనలేకపోయారు. త్వరలోనే టైటిల్, ఫస్ట్ లుక్ వస్తుందని మాత్రం చెప్పారు. బహుశా.. అప్పుడు దిల్ రాజు బయటపడతారేమో.