ఏపీ స‌ర్కార్ చెప్పిందేంటి? చేస్తుందేంటి?

ఉద్యోగుల వేత‌నాల విష‌యంలో ఏపీ స‌ర్కార్ చెప్పిందేంటి? చేస్తున్న‌దేంటి? అనే ప్ర‌శ్న‌లు వెల్లువెత్తుతున్నాయి. ముఖ్యంగా పింఛ‌న్‌దారుల విష‌యంలో ప్ర‌భుత్వం మాట త‌ప్పింద‌నే అభిప్రాయాలు వ్య‌క్త‌మ‌వుతున్నాయి. ప‌ట్ట‌ణ‌, న‌గ‌ర ప్రాంతాల్లో ఉన్న పెన్ష‌న‌ర్ల వేత‌నాల్లో కోత విధించారు. దీంతో వారు ల‌బోదిబోమంటున్నారు.

తిరుప‌తిలో ఓ వృద్ధ మ‌హిళా పెన్ష‌న‌ర్‌కు నూత‌న పీఆర్సీ అమ‌లు కాక మునుపు రూ.26 వేల వేత‌నం వ‌చ్చేది. నూత‌న పీఆర్సీ అమ‌లుతో ఆమె వేత‌నం రూ.32 వేల‌కు పెరిగింది. రూ.6 వేలు చొప్పున వేత‌నం పెరిగినందుకు ఆమెతో పాటు కుటుంబ స‌భ్యులు సంతోషించారు. అయితే వేత‌నం పెంపు సంతోషం నెల‌రోజుల ముచ్చ‌టే అని నిన్న‌టి తేలిపోయింది. ఈ నెల రూ.3 వేలు త‌గ్గిస్తూ ప్ర‌భుత్వం ఆమెకు వేత‌నం వేసింది. ఈ నేపథ్యంలో స‌ద‌రు పెన్ష‌న్‌దారు ఆశ్చ‌ర్యంతో పాటు ఆందోళ‌న‌కు గుర‌య్యారు.

క‌డ‌ప‌లో డిప్యూటీ ఎగ్జిక్యూటివ్ ఇంజ‌నీర్‌గా ప‌ద‌వీ విర‌మ‌ణ చేసిన ఉద్యోగి విష‌యంలోనూ ఇలాగే జ‌రిగింది. గ‌త నెల వేత‌నంతో పోల్చితే ఈ నెల ఏకంగా రూ.6 వేల వేత‌నం త‌గ్గింది. ఇలా ప‌లువురు పింఛ‌న్‌దారుల వేత‌నాల్లో కోత‌లు ప‌డ‌డంతో ఇదెక్క‌డి న్యాయ‌మ‌ని వారు ప్ర‌శ్నిస్తున్నారు. ఇటీవ‌ల ఏపీ హైకోర్టు ఉద్యోగుల వేత‌నాల‌కు సంబంధించి …ఎట్టి ప‌రిస్థితుల్లోనూ ఒక్క రూపాయి కూడా త‌గ్గించ‌కూడ‌ద‌ని స్ప‌ష్ట‌మైన ఆదేశాలు జారీ చేసింది.

ఒక‌వేళ త‌గ్గిస్తూ సీరియ‌స్‌గా ప‌రిగ‌ణిస్తామ‌ని కూడా హెచ్చ‌రించింది. అయిన‌ప్ప‌టికీ పింఛ‌న్‌దారుల విష‌యంలో ప్ర‌భుత్వం అమాన‌వీయంగా కోత విధించింద‌నే విమ‌ర్శ‌లు వెల్లువెత్తుతున్నాయి. ఇక రెగ్యుల‌ర్ ఉద్యోగుల వేత‌నాల విష‌యంలో వివ‌రాలు తెలియాల్సి వుంది. మొత్తానికి ప్ర‌భుత్వం వేత‌నాల్లో కోత‌ల‌ను చాలా సౌక‌ర్యంగా స‌మ‌ర్థించుకుంటోంది. ఇవి కోత‌లు కావ‌ని, వేత‌నాల్లో స‌ర్దుబాట్లుగా చెప్పుకుంటోంది.