Epaper
టాలీవుడ్ కు మిగిలిన సీజన్లు మూడే మూడు. సంక్రాంతి. సమ్మర్. దసరా. ఈ సీజన్లలోనే పెద్ద సినిమాలు విడుదల చేయాలనుకుంటారు. నాన్ సీజన్ లో వస్తే ఏమవుతుందో అన్న భయం వెంటాడుతూ వుంటుంది. ఎన్ని పెద్ద కబర్లు చెప్పినా, చివరకు చేసేది ఇదే.
ఈసారి దసరాకు కాస్త అటు ఇటుగా చాలా సినిమాలు మోహరిస్తున్నాయి. ఈ ఏడాది అక్టోబర్ లో వస్తోంది దసరా. దానికి కాస్త రెండు వారాలు ముందు నుంచి అటు ఇటుగా సినిమాలు ప్లాన్ చేస్తున్నారు. అయితే ఎవరు వస్తారు? ఎవరు ఆగుతారు? అన్నది తరువాత తెలుస్తుంది. ముందు అయితే ఎవరి సన్నాహాలు వారివి. అందులోనూ 2024 సంక్రాంతికి భారీ సినిమాలు వస్తాయని తెలుస్తోంది. వాటితో పోటీపడడం కష్టం. అది శంకర్-రామ్ చరణ్ సినిమా కావచ్చు. బన్నీ-సుకుమార్ సినిమా కావచ్చు. ప్రభాస్-ప్రాజెక్ట్ కే సినిమా కావచ్చు. అందుకే అందరి దృష్టి ఈ ఏడాది దసరా మీద పడింది.
ప్రభాస్ సలార్ సినిమాకు ఇప్పటికే డేట్ ఇచ్చేసారు. సెప్టెంబర్ నెలాఖరు అని. మెగాస్టార్ తో అనిల్ సుంకర నిర్మించే భోళాశంకర్ సినిమాను దసరాకు రెడీ చేయాలని డిసైడ్ అయిపోయారు. ఈ మేరకు ప్లాన్ చేస్తున్నారు.
పవన్ కళ్యాణ్ హరి హర వీరమల్లు సినిమాను ఎలాగైనా దసరాకు రెడీ చేయాలని నిర్మాత ఎఎమ్ రత్నం..దర్శకుడు క్రిష్ ల సంకల్పం. కానీ అది పవన్ దయ మీద ఆధారపడి వుంటుంది.
బాలయ్య-అనిల్ రావిపూడి-సాహు గారపాటి సినిమా కూడా జూలై నెలాఖరుకు పూర్తి చేసి, దసరాకు కాస్త ముందుగా విడుదల చేయాలని ఆలోచనలు సాగుతోంది.
మహేష్-త్రివిక్రమ్ సినిమాకు కూడా వున్న డేట్ ఇది ఒక్కటే. సంక్రాంతి అయితే బాగుంటుంది కానీ, అక్కడ ఎంత వరకు అవకాశం వుంటుందో తెలియదు.
ఇలా చాలా సినిమాలు ప్లానింగ్ లో వున్నాయి. అందువల్ల ఈసారి దసరా టైమ్ కు విడుదల గడబిడ కాస్త గట్టిగానే వుండేలా వుంది.