కృష్ణ మృతిపై బాధ‌ప‌డొద్దు…వినూత్న ట్వీట్‌!

సూప‌ర్‌స్టార్ కృష్ణ మృతిపై వివాదాస్ప‌ద ద‌ర్శ‌కుడు రాంగోపాల్ వ‌ర్మ వినూత్నంగా స్పందించారు. వ‌ర్మ ఏం చేసినా త‌న రూటే స‌ప‌రేట్ అన‌డం తెలిసిందే. కృష్ణ మృతిపై త‌న మార్క్ నివాళిని ఆయ‌న అర్పించ‌డం గ‌మ‌నార్హం. సూప‌ర్‌స్టార్ మృతిపై ఎవ‌రూ బాధ‌ప‌డొద్ద‌ని ఆయ‌న కోర‌డం విశేషం. కృష్ణ‌పై గౌర‌వం, అభిమానంతోనే ఆర్జీవీ ట్వీట్ చేశార‌నే అభిప్రాయాలు వ్య‌క్త‌మ‌వుతున్నాయి.

‘కృష్ణ  గారు చనిపోయారని బాధపడనవసరం లేదు. ఇప్పటికే ఆయన, విజయ నిర్మల గారిని స్వర్గంలో కలుసుకుని ఉంటారు. వాళ్లిద్ద‌రూ కలిసి స్వ‌ర్గంలో పాట‌లు పాడుతూ, నృత్యం చేస్తూ ఆనందంగా గడుపుతుంటారని అనుకుంటున్నా’ అంటూ ట్వీట్ చేశారాయ‌న‌. అంతేకాదు, ట్వీట్‌కు మోసగాళ్లకు మోసగాడు చిత్రంలో కృష్ణ‌, విజ‌య‌నిర్మ‌ల క‌లిసి పాడుతూ, డ్యాన్స్ చేస్తున్న వీడియోను జత చేశాడు.

ఈ ట్వీట్‌పై నెటిజ‌న్ల నుంచి ఎక్కువ‌గా పాజిటివ్ స్పంద‌నే వ‌చ్చింది. స్వర్గంలో కృష్ణ  కోసం “వస్తాడు నా రాజు ఈ రోజు” అని విజయ నిర్మల ఈరోజు  పాట పాడినట్టుందని, అందుకే ఆయ‌న బ‌య‌ల్దేరిన‌ట్టున్నార‌నే స్పంద‌న  నెటిజ‌న్ల నుంచి రావ‌డం విశేషం. 

కృష్ణ మృతి టాలీవుడ్‌ను దుఃఖ‌సాగ‌రంలో ముంచేసింద‌ని… వెల్లువెత్తుతున్న సంతాప సందేశాలు తెలియ‌జేస్తున్నాయి. రాజ‌కీయ‌, సినీ, త‌దిత‌ర రంగాల ప్ర‌ముఖులు కృష్ణ మృతిపై తీవ్ర సానుభూతి, ప్ర‌గాఢ సంతాపాల‌ను తెలుపుతున్నారు.