బుల్లితెరపై కూడా వీళ్లు జాతిరత్నాలే!

కరోనా తర్వాత, మారిన పరిస్థితుల మధ్య థియేటర్లలోకి వచ్చిన జాతిరత్నాలు సినిమా అనూహ్య విజయాన్ని సాధించింది. కళ్లుచెదిరే వసూళ్లు సాధించింది. ఓవర్సీస్ మార్కెట్ కు ఊపు తెచ్చిన సినిమా కూడా ఇదే. ఇలా సూపర్ హిట్టయిన ఈ సినిమా, బుల్లితెరపై కూడా తన ప్రభంజనం చాటింది.

వరల్డ్ టెలివిజన్ ప్రీమియర్ గా జెమినీ టీవీలో ఫస్ట్ టైమ్ ప్రసారం చేసిన ఈ సినిమాకు ఏకంగా 10.15 టీఆర్పీ వచ్చింది. ఇంకా చెప్పాలంటే ఈ ఏడాది టాప్-5 రేటింగ్స్ లో జాతిరత్నాలు కూడా చేరిపోయింది. అలా సిల్వర్ స్క్రీన్ తో పాటు.. స్మాల్ స్క్రీన్ పై కూడా హిట్టయింది ఈ సినిమా.

నిజానికి జాతిరత్నాలు సినిమా బుల్లితెరపై పెద్దగా ఆడదని అంతా అనుకున్నారు. దీనికి ఓ రీజన్ ఉంది. థియేటర్లలో బ్లాక్ బస్టర్ అయిన ఈ సినిమా తొందరగానే ఓటీటీలోకి వచ్చింది. అయితే ఓటీటీ ప్రేక్షకులు ఈ సినిమాను పెద్దగా పట్టించుకోలేదు. 

అనుకున్న స్థాయిలో నంబర్స్ లేదా వ్యూయర్ షిప్ రాలేదు. దీంతో టీవీల్లో కూడా ఈ సినిమా ఫెయిల్ అవుతుందని భావించారు. కానీ జాతిరత్నాలు మాత్రం టీఆర్పీలో 10 మార్క్ అందుకొని టీవీల్లో కూడా హిట్ అనిపించుకుంది.

నవీన్ పొలిశెట్టి, ప్రియదర్శి, రాహుల్ రామకృష్ణ హీరోలుగా నటించిన ఈ సినిమాను 4 కోట్ల రూపాయల బడ్జెట్ తో తెరకెక్కించగా.. ప్రపంచవ్యాప్తంగా 70 కోట్ల రూపాయలు కలెక్ట్ చేసింది. అనుదీప్ ఈ సినిమాకు డైరక్టర్.