పవన్ కల్యాణ్ ఫ్రస్ట్రేషన్.. మరీ అంతలానా!

'డబ్బులు పంచడంలో వైఎస్సార్ కాంగ్రెస్ పార్టీ విజయవంతం అయ్యింది. అందుకే ఆ పార్టీకి అధికారం అందింది..' అని జనసేన అధినేత పవన్ కల్యాణ్ వ్యాఖ్యానించారు. సార్వత్రి ఎన్నికల్లో వైఎస్ఆర్ కాంగ్రెస్ పార్టీ సాధించిన సంచలన విజయానికి రీజన్లను తను కనుక్కొన్నట్టుగా పవన్ కల్యాణ్ మాట్లాడారు. ఆ రీజన్ డబ్బే అని తేల్చారు!

175 సీట్లకు గానూ 151 ఒక్క సీట్లను ఒక పార్టీ నెగ్గితే, ప్రతి నియోజకవర్గంలోనూ భారీ మెజారిటీలు సాధిస్తే, గెలిచిన వాటిల్లో సగానికి పైగా నియోజకవర్గాల్లో ఇరవై వేలకు పైగా మెజారిటీలు దక్కితే.. కొన్ని చోట్ల ముప్పై వేలు, నలభై వేలు, యాభై వేల ఓట్ల తేడాతో కూడా వైఎస్సార్ కాంగ్రెస్ పార్టీ ఎమ్మెల్యేలు ఘన విజయం సాధిస్తే.. ఆ విజయాన్ని కేవలం డబ్బుతో సాధించినది అని మాట్లాడటం పవన్ కల్యాణ్ కే సాధ్యం అవుతున్నట్టుగా ఉంది.

రెండోచోట్ల ఎమ్మెల్యేగా పోటీచేసి, రెండు చోట్లా ఓడిన పార్టీ అధినేత అయిన పవన్ కల్యాణ్ ఇలా తన ఫ్రస్ట్రేషన్ ను చాటుకుంటూ ఉన్నారు. లేకపోతే ప్రజాతీర్పు పవన్ కల్యాణ్ కు మరీ అంత చులకన అయిపోవడం గమనార్హం! తనను రెండు చోట్ల ఎమ్మెల్యే ఓడించిన ప్రజల మీద పవన్ కల్యాణ్ కు ఆ రేంజ్ లో కసి ఉన్నట్టుంది.

ఏ ఎన్నికల్లో అయినా ఎంతో కొంత డబ్బు ప్రభావం ఉంటుంది. దాన్ని ఎవరూ కాదనడం లేదు. అయితే కేవలం డబ్బుతోనే గెలవడం అంటే మాత్రం అడి సాధ్యం అయ్యే పనికాదని ఇంగిత జ్ఞానం ఉన్న ఎవరైనా చెబుతారు. అయితే పవన్ కల్యాణ్ మాత్రం.. వైఎస్సార్ కాంగ్రెస్ పార్టీ రాష్ట్రంలోని అన్ని ఓట్లనూ డబ్బు పెట్టి కొనుగోలు చేసిందని మాట్లాడుతూ ఉన్నారు.

ఇక్కడ మరో విషయం కూడా ఉంది. ఒకవేళ పవన్ కల్యాణ్ థియరీనే నిజం అనుకుంటే.. ఆయనకు ఇక జీవితంలో అధికారం అందడం కాదు కదా, కనీసం ఎమ్మెల్యేగా కూడా నెగ్గలేరు. ప్రతిపక్షంలో ఉన్న ప్పుడే వైఎస్ఆర్ కాంగ్రెస్ పార్టీ అలా డబ్బును పంచిందంటే, పవన్ చెప్పినట్టుగా 'డబ్బులు పంచడంలో విజయవంతం అయ్యింది..' అంటే, ఇప్పుడు అధికారంలో ఉంది ఆ పార్టీ. డబ్బును మరింత నేర్పుతో భవిష్యత్తులో పంచగలదేమో పవన్ కల్యాణూ!

నువ్వు చెప్పిందే నిజం అయితే, ఇక నువ్వు ఎమ్మెల్యేగా నెగ్గే అవకాశాలు భవిష్యత్తులో కూడా ఉండవు.. అని పవన్ కల్యాణ్ ను ఉద్దేశించి సోషల్ మీడియాలో కామెంట్లు వినిపిస్తూ ఉన్నాయి!