Epaper
శర్వానంద్-త్రివిక్రమ్ కలిసి సినిమా చేయలేదు. కనీసం తన సినిమాల్లో శర్వానంద్ కు ఓ పాత్ర కూడా ఇవ్వలేదు త్రివిక్రమ్. కానీ శర్వా నటించిన రణరంగం సినిమా ట్రయిలర్ లాంఛ్ కార్యక్రమానికి మాత్రం వచ్చాడు. ఈ సందర్భంగా త్రివిక్రమ్ తో తనకున్న అనుబంధాన్ని గుర్తుచేసుకున్నాడు శర్వానంద్. ఇప్పటివరకు త్రివిక్రమ్ తనకు ఎందుకు ఛాన్స్ ఇవ్వలేదో చెప్పుకొచ్చాడు.
“నేను సినిమా ఛాన్సుల కోసం ట్రై చేస్తున్నప్పుడు, క్యారెక్టర్ల కోసం నేను ట్రై చేస్తున్నప్పుడు త్రివిక్రమ్ ను కలిసేవాడ్ని. ఆయన అప్పటికి డైరక్టర్ కూడా కాలేదు. పెద్ద రైటర్. మా ఇద్దరి మధ్య జరిగిన ఓ సంఘటన నాకు బాగా గుర్తు. కారులో వెళ్తున్నప్పుడు ఏదైనా క్యారెక్టర్ ఉంటే ఇవ్వమని అడిగాను. నీతో సినిమా చేస్తే నిన్ను హీరోగా పెట్టి చేస్తా తప్పితే, క్యారెక్టర్ మాత్రం ఇవ్వనని త్రివిక్రమ్ అప్పుడే అన్నారు. మరి ఆయన ఏ ఉద్దేశంతో అన్నారో కానీ ఇప్పటివరకు నాకు క్యారెక్టర్ ఇవ్వలేదు.”
తనకు ఇప్పటివరకు హీరోగా ఛాన్స్ ఇవ్వలేదని పరోక్షంగా గుర్తుచేస్తూ శర్వానంద్ ఇలా మాట్లాడాడు. ఆ రోజు కోసం వెయిట్ చేస్తున్నానని కూడా ప్రకటించాడు. కానీ త్రివిక్రమ్ మాత్రం శర్వాతో సినిమా చేయడంపై రియాక్ట్ అవ్వలేదు. చాలా ఏళ్లుగా శర్వా తనకు పరిచయమని, మంచి మనిషంటూ మెచ్చుకున్నాడు తప్ప, అంతకుమించి స్పందించలేదు.
ఒకప్పుడు, ఇప్పుడు పెద్ద హీరోలతో మాత్రమే సినిమాలు చేస్తున్నాడు త్రివిక్రమ్. కానీ ఎప్పుడైతే నితిన్ లాంటి హీరోను పెట్టి అ..ఆ అనే సినిమా చేశాడో అప్పట్నుంచి ఇతర హీరోలకు కూడా త్రివిక్రమ్ తో సినిమా చేయొచ్చనే నమ్మకం కుదిరింది. శర్వానంద్ కు కూడా అదే నమ్మకం. ఆ నమ్మకం నిజమవ్వాలంటే ఇంకెన్నాళ్లు టైమ్ పడుతుందో చూడాలి.