Epaper
అసలే లాక్ డౌన్ సమయం, కరోనా విజృంభిస్తున్న వేళ.. ప్రజా ప్రతినిధుల పరిస్థితి అడకత్తెరలో పోకచెక్కలా మారింది. బైటకు వెళ్తే లాక్ డౌన్ నిబంధనలు ఉల్లంఘించారంటారు, ఇంట్లో ఉంటే ప్రజల కష్టాలు పట్టవా అని ప్రశ్నిస్తారు. ఈ నేపథ్యంలో మంత్రులు, ఎమ్మెల్యేలంతా జనంలో తిరగడానికే ఇష్టపడుతున్నారు. ఇలాంటి టైమ్ లో ఎరక్కపోయి, బర్త్ డే కేక్ కోసి ఇరుక్కుపోయారు తెలంగాణ మంత్రి పువ్వాడ అజయ్ కుమార్.
మంత్రి మీద అభిమానంతో ఆ శాఖ సిబ్బంది సర్ ప్రైజ్ పార్టీ ఇచ్చారు. సడన్ గా కేక్ తీసుకొచ్చి కట్ చేయమని టేబుల్ పై పెట్టారు. జనాలకి ఓ మెసేజ్ ఇచ్చే ఉద్దేశంతో కరోనా వైరస్ ని పోలినట్టు కేక్ తయారు చేయించారు, కరోనా మహమ్మారిని మంత్రి చీల్చి చెండాడుతున్నట్టు పెద్ద కత్తిని ఆయన చేతికి అందించారు.
ఇంతవరకు బాగానే ఉంది కానీ ఆ వీడియో సోషల్ మీడియాలోకి ఎక్కడంతో అసలు రచ్చ మొదలైంది. కరోనా కష్టకాలంలో మంత్రిగారికి పుట్టినరోజు వేడుకలు కావాల్సి వచ్చాయా అంటూ విమర్శలు మొదలయ్యాయి. అసలు కరోనా కాలంలో కేక్ ఎలా తయారు చేశారు, ముందు ఆ బేకరీ సంగతి తేల్చండి అంటూ కొందరు మంచి లాజిక్ పాయింట్ తీశారు. చివరకు ఈ వ్యవహారం కేసీఆర్ దగ్గరకు చేరింది.
తెలంగాణలో కరోనా విజృంభణ కొనసాగుతుండటంతో లాక్ డౌన్ ని మే-7 వరకూ పొడిగించి సంచలన నిర్ణయం తీసుకున్న కేసీఆర్.. ఈ వార్త విని మంత్రికి ఫోన్ చేసి ఆగ్రహం వ్యక్తం చేశారు. కరోనాపై అవగాహన కల్పించేందుకే అలాంటి కేక్ కట్ చేశామని, పుట్టినరోజు జరుపుకోవాలని తాను అనుకోలేదని వివరణ ఇచ్చుకున్నారట మంత్రి అజయ్.
మంత్రి వివరణతో ఆ వివాదానికి ఫుల్ స్టాప్ పడినా, సోషల్ మీడియాలో ట్రోలింగ్స్ మాత్రం ఆగలేదు. మంత్రి అయినా, సామాన్యులైనా.. కరోనా టైమ్ లో ఏదైనా చేసేముందు ఒకటికి రెండుసార్లు ఆలోచించుకోవడం మంచిది.