ఈవీవీ కొడుకులిద్దరూ మారిపోయారు

దర్శకుడిగా తనకంటూ ఓ గుర్తింపు తెచ్చుకున్న ఈవీవీ సత్యనారాయణ, కొడుకులిద్దర్నీ హీరోల్ని చేశాడు. కాకపోతే వాళ్లకు స్టార్ స్టేటస్ మాత్రం ఆపాదించలేకపోయాడు. పెద్దకొడుకు ఆర్యన్ రాజేష్ కొన్ని సినిమాలు చేసినప్పటికీ క్లిక్ అవ్వలేకపోయాడు. ఇక చిన్నకొడుకు అల్లరి నరేష్, సుడిగాడు లాంటి భారీ హిట్ అందుకున్నప్పటికీ.. రీసెంట్ గా పూర్తిగా చతికిలపడ్డాడు. ఇప్పుడీ అన్నదమ్ములిద్దరూ కొత్త దశలోకి ఎంటరయ్యారు.

చాన్నాళ్లుగా సినిమాలు చేయడం ఆపేసిన ఆర్యన్ రాజేష్, ఇప్పుడు క్యారెక్టర్ రోల్స్ కు షిఫ్ట్ అయ్యాడు. బోయపాటి దర్శకత్వంలో రామ్ చరణ్ చేస్తున్న కొత్త సినిమాలో ఓ కీలక పాత్రలో కనిపించబోతున్నాడు ఆర్యన్. మరీ ముఖ్యంగా ఇదొక నెగెటివ్ టచ్ ఉన్న రోల్ అని తెలుస్తోంది. ఈ సినిమాతో సెకెండ్ ఇన్నింగ్స్ స్టార్ట్ చేయాలని భావిస్తున్నాడు ఈ హీరో. 

ఇక తమ్ముడు అల్లరి నరేష్ అయితే ఇప్పటికే ట్రాక్ మార్చేశాడు. మహేష్-వంశీ పైడిపల్లి దర్శకత్వంలో తెరకెక్కుతున్న సినిమాలో ఓ కీలకపాత్ర చేస్తున్నాడు. మహేష్ కు బెస్ట్ ఫ్రెండ్ క్యారెక్టర్ లో కనిపించబోతున్నాడు. 

ఇలా ఈ అన్నదమ్ములిద్దరూ ఒకేసారి హీరో వేషాలు కట్టిపడేసి, క్యారెక్టర్ ఆర్టిస్టులుగా మారారు. ఈ కొత్త ప్రయోగాలు ఈవీవీ తనయులకు ఎలాంటి ఇమేజ్ తెచ్చిపెడుతుందో చూడాలి.