సవ్యసాచికి ఏమైంది? చప్పుడు చేయడేంటి?

లెక్కప్రకారం ఈపాటికి టీజర్ రిలీజ్ అవ్వాలి. ఇంకా చెప్పాలంటే ఈరోజు టీజర్ విడుదల చేస్తామన్నారు. కానీ సవ్యసాచి చప్పుడు చేయడం లేదు. అసలు వారం రోజులుగా ఈ సినిమాకు సంబంధించి ఎలాంటి అప్ డేట్స్ లేవు.

మూవీకి సంబంధించి ఇప్పటికే షూటింగ్ పూర్తయింది. న్యూయార్క్ షెడ్యూల్ తర్వాత హైదరాబాద్ లో నిర్వహించిన మరో షెడ్యూల్ తో టోటల్ షూటింగ్ కంప్లీట్ అయింది. న్యూయార్క్ షెడ్యూల్ తర్వాత టీజర్ రిలీజ్ చేస్తామని ప్రకటించిన మైత్రీ మూవీ మేకర్స్ నిర్మాతలు ప్రస్తుతం సైలెంట్ అయిపోయారు.

సవ్యసాచి సినిమాకు సంబంధించి బిజినెస్ ఇంకా క్లోజ్ అవ్వలేదు. ప్రస్తుతం నిర్మాతలు అదే పనిలో ఉన్నారు. మైత్రీ మేకర్స్ చెబుతున్న ఎమౌంట్ కు, నాగచైతన్య మార్కెట్ కు మధ్య భారీ వ్యత్యాసం ఉన్నట్టు తెలుస్తోంది. అందుకే బిజినెస్ లో ఇబ్బందులు తలెత్తుతున్నాయి.

అనుకున్నట్టుగానే 3కోట్ల 15లక్షల రూపాయలకు ఓవర్సీస్ ను ఎలాగోలా సెట్ చేశారు కానీ ఆంధ్రాలో బిజినెస్ మాత్రం ఓ కొలిక్కిరావడం లేదు. నాగచైతన్య సినిమాలు ఆడితే ఓ మోస్తరుగా ఆడతాయి. లేదంటే యుద్ధంశరణం సినిమా టైపులో డిజాస్టర్లు అవుతాయి. పైగా చైతూకు యాక్షన్ సబ్జెక్ట్ కలిసొచ్చిన దాఖలాల్లేవ్.

అందుకే బిజినెస్ లో ఇబ్బందులు ఎదురవుతున్నాయి. ఆంధ్రాకు సంబంధించిన డీలింగ్స్ కంప్లీట్ అయిన వెంటనే టీజర్ రిలీజ్, ఆడియో రిలీజ్, సినిమా విడుదల తేదీలను అధికారికంగా ప్రకటిస్తారు. జులైలో వస్తుందనుకున్న ఈ సినిమా ఇప్పుడు ఆగస్ట్ కు పోస్ట్ పోన్ అయ్యేలా ఉంది.