సైరాకు ఇళయరాజా అయితే..?

మెగాస్టార్ చిరంజీవి ప్రెస్టీజియస్ సినిమా సైరా సినిమా ట్రయిల్ షూట్ అయిపోయింది. రియల్ షూట్ ఈనెలలో ప్రారంభం కాబోతోంది. అయితే అది చాలా అంటే చాలా చిన్న షెడ్యూలు మాత్రమే అని తెలుస్తోంది. ఇదిలా వుంటే ఇప్పటి వరకు ఈసినిమాకు కీలకమైన మ్యూజిక్ డైరక్టర్ ఎవరు అన్నది తేలనే లేదు. ఎఆర్ రెహమాన్ అనుకుంటే, ఆయన నో అనేసారు. సినిమాకు ఆల్ ఇండియా లెవెల్లో వినిపించే, గుర్తింపు వున్న పేరునే యాడ్ చేయాలన్నది మెగాస్టార్ ఇంకా జూనియర్ మెగాస్టార్ ఆలోచన.

ఆ మధ్య అంతా కీరవాణి పేరు వినిపించింది. అది మంచి ఆలోచనే అని కూడా వినిపించింది. ఎందుకంటే బాహుబలి సినిమాతో కీరవాణి బాగా పాపులర్ అయ్యారు. అంతకు ముందు కూడా ఆయన బాలీవుడ్ కు పరిచయమే. ఎమోషనల్ సినిమాలకు నేపథ్య సంగీతం ఇవ్వడంలో కీరవాణి స్పెషలిస్ట్ కూడా. అయితే మరి డిస్కషన్లు ఎంతవరకు వచ్చాయి? ఏమయింది? అన్నది క్లియర్ గా బయటకు రాలేదు.

ఇప్పుడు లేటెస్ట్ గా ఇళయరాజా పేరు కూడా వినిపిస్తోంది. ఇళయరాజాకు పద్మవిభూషణ్ అవార్డు వచ్చిన తరువాత ఆయనను మెగాస్టార్ పర్సనల్ గా అభినందించినట్లు బోగట్టా. అలాగే త్వరలో టాలీవుడ్ తరపున ఇళయరాజాకు సన్మానం చేయాలన్నదానిని కూడా మెగాస్టారే ఇనీషియేట్ చేసినట్లు తెలుస్తోంది.

ఇప్పుడు సైరాకు ఇళయరాజా పేరు డిస్కషన్ లోకి వచ్చినట్లు, అయితే మెగా క్యాంప్ లో కొంతమంది కీరవాణే బెటర్ అని అభిప్రాయపడుతున్నట్లు తెలుస్తోంది. ఇళయరాజాతో ట్యూన్ లు చేయించుకొవడం అన్నది దర్శకులకు కాస్త కత్తిమీద సాము అని అంటారు. ఆ పాయింట్ లోనే వారు కీరవాణి బెటర్ అని అంటున్నట్లు తెలుస్తోంది. కానీ చిరు కెరీర్ లో ఇళయరాజా ఇచ్చిన హిట్ లు ఇన్నీ అన్నీ కావు.

మరి మెగాస్టార్ చిరంజీవి ఏ నిర్ణయం తీసుకుంటారో? ఎప్పుడు తీసుకుంటారో? చూడాలి.