అర్జున్ రెడ్డి రీమేక్ నో చెప్పిన స్టార్‌హీరో!

తెలుగు సూపర్ హిట్ అర్జున్ రెడ్డి తమిళ రీమేక్ ఇప్పటికే పట్టాలు ఎక్కింది. చాలా హిట్ సినిమాల రీమేక్ ప్రతిపాదనలు ప్రతిపాదనలుగానే మిగిలిపోతూ ఉంటాయి. అయితే అర్జున్ రెడ్డి రీమేక్ లు మాత్రం శరవేగంగానే పట్టాలు ఎక్కుతున్నాయి. ఈ క్రమంలో తమిళనాట జాతీయ అవార్డెడ్ దర్శకుడు బాల ఈ సినిమా రీమేక్ బాధ్యతలను తీసుకున్నాడు.

బాల వంటి దర్శకుడు అర్జున్ రెడ్డి ని రీమేక్ చేస్తున్నాడంటే.. ఈ స్క్రిప్ట్ కు మరింత గౌరవం దక్కినట్టే నిస్సందేహంగా. కన్నడలో కూడా ఈ సినిమా రీమేక్ కావడం ఖరారే. అసలే రీమేక్ సినిమాలు అంటే కన్నడ హీరోలు పడిచస్తారు. ఈ క్రమంలో శాండల్ వుడ్ స్టార్ యశ్ ఈ సినిమాను రీమేక్ చేయనున్నాడని తెలుస్తోంది. ఇదిలా ఉంటే.. హిందీ రీమేక్ విషయంలో మాత్రం హీరోల తర్జనభర్జనలు సాగుతున్నట్టుగా తెలుస్తోంది.

ఈ సినిమాను హిందీలో చేయడానికి ముందుగా రణ్ వీర్ సింగ్ ను అనుకున్నారు. అతడు కూడా మొదట్లో సై అన్నాడు కానీ.. ఇప్పుడు మాత్రం ఆ హీరో వెనుకాడుతున్నట్టుగా తెలుస్తోంది. దీనికో కారణం ఉంది. బాలీవుడ్ లో ‘పద్మావతి’ సినిమాలో నెగిటివ్ రోల్ చేశాడు రణ్ వీర్. అది కూడా అల్లావుద్ధీన్ ఖిల్జీ పాత్రను చేశాడు. ఈ సినిమానే బ్యాక్ ఫైర్ అయ్యింది.

ఇలాంటి నేపథ్యంలో అర్జున్ రెడ్డి లాంటి బోల్డ్ సినిమాను చేయడానికి రణ్ వీర్ వెనుకాడుతున్నట్టుగా తెలుస్తోంది. ఈ సినిమా ఎక్కడైనా సంచలనం అవుతుంది.. వివాదాలు తప్పవు. అందుకే.. రణ్ వీర్ ఈ రీమేక్ ను మిస్ చేసుకున్నాడని సమాచారం. దీంతో.. ఇప్పుడు షాహిద్ కపూర్ తెరపైకి వచ్చినట్టుగా తెలుస్తోంది. షాహిద్ తో ఈ సినిమా హిందీలో రీమేక్ అయ్యే అవకాశాలు కనిపిస్తున్నాయి. దర్శకత్వం ఛాన్స్ ఒరిజినల్ ను చెక్కిన సందీప్ రెడ్డికే దక్కవచ్చును అని టాక్.