Epaper
బోయపాటి-బాలయ్య సినిమా ఎప్పుడు? బాలయ్య అభిమానులు ఎదురు చూస్తున్న సినిమా ఇది. ఇప్పటికే బోయపాటి చెప్పేసాడు. రామచరణ్ సినిమా తరువాత బాలయ్య సినిమానే చేస్తానని. దాంతో ఆ ప్రాజెక్టు కోసం నిర్మాతలు క్యూ కట్టేస్తున్నారు. వాస్తవానికి బోయపాటి-బాలయ్య సినిమా అంటే సాయి కొర్రపాటి నిర్మాతగా వుంటారని అనుకుంటారు.
కానీ ఈసారి అలా వుండకపోవచ్చని తెలుస్తోంది. సాయి-బోయపాటిల మధ్య చిన్న అంతరం నెలకొందన్న అనుమానాలు ఇండస్ట్రీలో వినిపిస్తున్నాయి. 14 రీల్స్ సంస్థ బోయపాటిని మహేష్ బాబుతో కలపాలని చూస్తోంది. మైత్రీ మూవీస్ సంస్థ బోయపాటిని పవర్ స్టార్ పవన్ కళ్యాణ్ తో కలపాలని అనుకుంటోందని వార్తలు వున్నాయి.
మరి బాలయ్య సినిమాకు ఎవరు రెడీ. అలా అంటే చాలా మందే వున్నారు. పైసా వసూల్ తీసిన భవ్య క్రియేషన్స్, లేటెస్ట్ హిట్ జై సింహా తీసిన సి.కళ్యాణ్ తెగ ఆసక్తిగా వున్నారని తెలుస్తోంది. బాలయ్య ఎవరికి గ్రీన్ సిగ్నల్ ఇస్తే వాళ్లకే సినిమా వుంటుంది.
కానీ ఈసారి బాలయ్య తన బ్యానర్ పైనే బోయపాటి సినిమా చేసే ఆలోచనలో వున్నట్లు చిన్నగా వదంతులు వినిపిస్తున్నాయి. తన తండ్రి బయోపిక్ కోసం బాలయ్య స్వంత బ్యానర్ స్టార్ట్ చేస్తున్న సంగతి తెలిసిందే. అయితే ఆ ప్రాజెక్టులో ఇంకా మరో ఇద్దరు భాగస్వాములు వున్నారు.
అందుకే బోయపాటి సినిమాను సోలోగా నిర్మించే ఆలోచనలో బాలయ్య వున్నారని, అలా కాని పక్షంలో బాలయ్య బ్యానర్ ప్లస్ మరో బ్యానర్ కలిసి వుంటాయని టాక్ వినిపిస్తోంది. బోయపాటి బాలయ్య సినిమా అంటే ఖర్చు కనీసం 40నుంచి యాభై మధ్య వుంటుంది. రాబడీ అలాగే వుంటుంది. మరి ఎవరికి దక్కుతుందో ప్రాజెక్టు చూడాలి.