మరోసారి సంక్రాంతి బరిలో బాలయ్య

సంక్రాంతికి ఎక్కువ సార్లు థియేటర్లలోకి వచ్చిన రికార్డు బాలయ్యదే. ఈమధ్య కాలంలో ఠంచనుగా సంక్రాంతికి ఓ సినిమా రిలీజ్ చేస్తున్నాడు. వచ్చే ఏడాది సంక్రాంతికి కూడా బాలయ్య రెడీ అవుతున్నట్టు తెలుస్తోంది. పూరిజగన్నాథ్ తో చేస్తున్న పైసా వసూల్ సినిమా థియేటర్లలోకి వచ్చిన తర్వాత, నెక్ట్స్ చేయబోయే మూవీ సంక్రాంతికే అనే టాక్ వినిపిస్తోంది.

కేఎస్ రవికుమార్ దర్శకత్వంలో ఓ యాక్షన్ ఎంటర్ టైనర్ చేసేందుకు ఒప్పుకున్నాడు బాలయ్య. వచ్చేనెల 10 నుంచి ఈ సినిమా రెగ్యులర్ షూటింగ్ మొదలవుతుంది. సి.కల్యాణ్ నిర్మాతగా తెరకెక్కనున్న ఈ సినిమాను సంక్రాంతికి విడుదల చేయాలని ప్లాన్ చేస్తున్నారు.

2016 సంక్రాంతికి డిక్టేటర్ సినిమాను రిలీజ్ చేసిన బాలయ్య, ఈ ఏడాది సంక్రాంతికి తన వందో సినిమా గౌతమీపుత్ర శాతకర్ణిని థియేటర్లలోకి తీసుకొచ్చాడు. వచ్చే ఏడాది కేఎస్ రవికుమార్ సినిమాను సంక్రాంతి కానుకగా విడుదల చేయాలని అనుకుంటున్నాడు.

వచ్చే ఏడాది సంక్రాంతికి ఇప్పటికే 2 సినిమాలు కర్చీఫ్ వేశాయి. ప్రస్తుతం రామ్ చరణ్ చేస్తున్న రంగస్థలం సినిమా, త్వరలోనే మహేష్-కొరటాల కాంబోలో సెట్స్ పైకి రానున్న భరత్ అనే నేను సినిమాలు సంక్రాంతికి వస్తున్నాయి. ఇప్పుడు బాలయ్య కూడా రంగంలోకి దిగుతున్నాడట.