Epaper
ధనుష్ సినిమా నవమన్మథుడు .. విడుదల ఈ వారంలోనే… అంటూ ఊదరగొట్టేస్తున్నారు. ఒకవైపు లోఫర్ విడుదల అవుతుండగా… మరోవైపు ఇదే వారంలో ఈ సినిమా కూడా విడుదల కానుంది. తమిళంలో తంగమగన్ పేరుతో రూపొందిన ఈ సినిమాను తెలుగులో 'నవమన్మథుడు' పేరుతో విడుదల చేస్తున్నారు. సమంత, ఎమీ జాక్సన్ లు నటించిన ఈ సినిమా ఒక రా అండ్ రియల్ ఫిల్మ్ అని ప్రచారం చేస్తున్నారు.
ఇక్కడ ఆసక్తికరమైన అంశం ఏమిటంటే.. ఈ సినిమా ఆరంభంలో దీనికి పెట్టిన టైటిల్ వేరు. ఈ సినిమా ప్రారంభం అయినప్పుడు దీనికి “వీఐపీ -2'' గా నామకరణం చేశారు. ధనుష్ , అమలపాల్ కాంబోలో “వీఐపీ' అనే ఒక సినిమా వచ్చిన విషయం విదితమే. తెలుగులో 'రఘువరన్ బీటెక్'' పేరుతో విడుదలై ఆ సబ్జెక్టు సూపర్ హిట్టైంది. తెలుగులో ధనుష్ కు ఒక మంచి హిట్ ఇచ్చింది ఆసినిమా. అలాంటి సినిమాకు సీక్వెల్ గా.. వీఐపీకి దర్శకత్వం వహించిన వేల్ రాజ్ దర్శకత్వంలోనే ఈ సినిమా రూపొందనుందని ప్రకటించారు.
వీఐపీ-2 అంటూ టైటిల్ ను కూడా ప్రచారం లోకి తీసుకొచ్చారు. అయితే ఏమైందో ఏమో కానీ.. విడుదల సమయానికి ఈ సినిమా టైటిల్ మారిపోయింది. తమిళంలో రజనీకాంత్ కెరీర్ లో 'తంగమగన్' అని ఒక సినిమా ఉంది.. దాన్నే వాడుకొంటూ ధనుష్ సినిమాకు అదే టైటిల్ పెట్టారు. వీఐపీ సినిమాను పూర్తిగా మరచిపోండి.. తంగమగన్ గా ఈ సినిమాను గుర్తుంచుకోండి.. అన్నట్టుగా సినిమా పేరు మార్చారు.
మరి వీఐపీ సినిమాకు తెలుగులో కూడా పెద్ద అభిమాన బలగమే ఉంది… దానికి సీక్వెల్ అంటున్నారని చెప్పి.. ధనుష్ తాజా సినిమాపై వాళ్లంతా ఆసక్తిని పెంచుకున్నారు. అయితే విడుదల సమయానికి 'రఘువరన్ బీటెక్'' సినిమాకు సీక్వెల్ లా వస్తుందనుకున్న సినిమాను 'నవమన్మథుడు' గా తీసుకొచ్చారు. దీంతో చాలా మందిలో ఈ సినిమాపై కొంత ఆసక్తి తగ్గిపోయింది!