‘గాలి’ పాటను వాడేసిన మారుతి

గాలి జనార్థన రెడ్డి కన్నడ, తెలుగు రాష్ట్రాల్లో ఓ సంచలనం. ఓ సెలబ్రిటీ. ఆయన ఆ మధ్య కూతురి పెళ్లిని అంగ రంగ వైభోగంగా చేసారు. ఈ పెళ్లి సందర్భంగా అతిధులను ఆహ్వనిస్తూ ఓ ఫ్యామిలీ సాంగ్ చేసి మరీ విడుదల చేసారు. అచ్చం సినిమా పాట మాదిరిగా సెట్టింగ్, మేకప్, లైటింగ్ ఒకటేమిటి చాలా హడావుడి చేసారు. జనం ఆ పాట మరిచిపోయారో లేదో కానీ దర్శకుడు మారుతి మర్చిపోలేనట్లు వుంది.

ఆయన నిర్మాణ పర్యవేక్షణలో తయారైన చిత్రం బ్రాండ్ బాబు. ఈ సినిమాతో కన్నడ రాష్ట్రం నుంచి వచ్చిన సుమంత్ శైలేంద్ర తెలుగు రంగానికి పరిచయం అవుతున్నారు. ఈ సినిమాలో అచ్చంగా గాలి జనార్థన రెడ్డి ఫ్యామిలీ సాంగ్ ను దింపేసారు మారుతి. గాలి జనార్థన రెడ్డి దంపతులకు బదులు మురళీ శర్మ దంపతులు సినిమాలో కనిపిస్తారు. అలాగే అక్కడ గాలి తనయుడికి బదులు ఇక్కడ హీరో కనిపిస్తాడు.

ట్యూన్ అచ్చంగా అదే. కాస్త పాట మాత్రం రాయించుకున్నారు. చిత్రీకరణ కూడా అదే స్టయిల్ లో కాస్త దేవాలయ మండపం లాంటి సెట్టింగ్ వేసి తీసేసారు. అప్పట్లో ఆ వేడిలో అయితే జనం ఇట్టే గుర్తుపట్టేసి వుండేవారేమో? కానీ చాలాకాలం అయిపోయింది కాబట్టి గుర్తు చేస్తేనే తెలుస్తుందేమో?