Epaper
బహుశా ఇప్పటిదాకా ఇండియాలో ఇంత ఎక్కువగా వార్తల్లోకెక్కిన సినిమా ఇంకోటి లేదనడం అతిశయోక్తి కాదేమో. అవును మరి, అది రజనీకాంత్‌ సినిమా. తమిళ సినీ రంగంలో సూపర్‌ స్టార్‌ అయిన రజనీకాంత్‌కి దేశవ్యాప్తంగా అభిమానులున్నారు. ప్రపంచంలోని వివిధ దేశాల్లోనూ రజనీకాంత్‌ సినిమాలకి మంచి 'డిమాండ్‌' వుంది. అలా, రజనీకాంత్‌.. ఇండియన్‌ సినిమాకే సూపర్‌ స్టార్‌ అయిపోయాడనొచ్చు.
బ్యాక్‌ టు బ్యాక్‌ రెండు ఫ్లాప్‌ సినిమాల తర్వాత రజనీకాంత్‌ నుంచి వస్తోన్న సినిమా అయినప్పటికీ 'కబాలి'పై అంచనాలు తగ్గలేదు సరికదా, ఆ అంచనాలు పదింతలైపోయాయి. ఏమి హైప్‌ ఇది.? ఇంతకు మించి హైప్‌ క్రియేట్‌ అవడానికి ఇంకేమీ లేదనేంతలా అంచనాలు నెలకొన్నాయి ఈ సినిమా మీద. మరి, ఆ అంచనాలకు తగ్గట్టు 'కబాలి' బాక్సాఫీస్‌ వద్ద విజయఢంకా మోగిస్తుందా.? కాస్సేపట్లో తేలిపోతుందది.
ఈలోగా, 'కబాలి' రివ్యూ అంటూ సోషల్‌ మీడియాలో హల్‌చల్‌ చేసేస్తున్నారు రజనీకాంత్‌ అభిమానులు. 'ఇది రజనీ అభిమానులకు ఐ ఫీస్ట్‌.. జనరల్‌ ఆడియన్స్‌కి అంతగా ఎక్కకపోవచ్చు..' అని ఆ రివ్యూల్లో కొందరు ముక్తాయింపు ఇస్తోంటే, చాలామంది మాత్రం రివ్యూల్ని సూపర్‌ పాజిటివ్‌గా తయారు చేసి వదిలేస్తున్నారు. కొన్ని దేశాల్లో ఆల్రెడీ షోస్‌ పడిపోవడంతో రివ్యూలు బయటకు వస్తున్నాయి.
ప్రస్తుతానికైతే రజనీకాంత్‌ 'కబాలి' అంచనాలకు తగ్గ విజయాన్ని నమోదు చేస్తుందనే టాక్‌ని సంపాదించుకుంది. రియల్‌ టాక్‌ మాత్రం రేపు మార్నింగ్‌ షో నాటికి అందుతుంది. అప్పటిదాకా 'కబాలి' ఫీవర్‌లో అంతా ఊగిపోవాల్సిందే.