కంగనా ‘లేడీ డాన్‌’.. ఎన్ని గెటప్పులో.!

బాలీవుడ్‌ బ్యూటీ కంగనా రనౌత్‌ 'సిమ్రాన్‌' అనే సినిమాలో నటిస్తోన్న విషయం విదితమే. ఈ సినిమాలో ఎన్నారైగానూ, లేడీ డాన్‌లానూ కంగనా రనౌత్‌ కన్పించనుంది. ఓ అమాయక యువతి, మాఫియా చేతుల్లో చిక్కుకుని ఎలా మాఫియా ప్రపంచంలో నిలదొక్కుకుందన్న కథాంశంతో 'సిమ్రాన్‌' సినిమా తెరకెక్కుతోందట. 

ఇక, ఈ సినిమా కోసం ముందుగా రెండు గెటప్స్‌ని అనుకున్నారు. ఓ గెటప్‌లో హౌస్‌ కీపింగ్‌ చేసే మహిళగా కంగనా కన్పించనుంది. దీనికోసం కంగనా పెద్దగా కసరత్తులు చేయాల్సిన అవసరం రాలేదట. ఇంకో పాత్ర కోసం మాత్రం కంగన చాలా బ్యాక్‌గ్రౌండ్‌ వర్క్‌ చేసిందట. లేడీ డాన్‌ లుక్‌ కోసం కంగన నానా తంటాలూ పడిందట. కంగనా గతంలోనూ ఈ తరహా గెటప్‌లో కన్పించినా, 'సిమ్రాన్‌'లో ఆమె డాన్‌ గెటప్‌ ఇంకా డిఫరెంట్‌గా వుంటుందని చిత్ర యూనిట్‌ చెబుతోంది. 

ఈ రెండు గెటప్స్‌కి తోడు, ఇంకో నాలుగైదు గెటప్స్‌ వుంటాయనీ, అయితే అవన్నీ సినిమాల్లో కాస్సేపు మాత్రమే కన్పిస్తాయనీ తెలుస్తోంది. కంగనా అంటే ఒకప్పుడు అందాల విందుకే పరిమితమైన హీరోయిన్‌. కానీ కంగనా అంటే ఇఫ్పుడు బాలీవుడ్‌లో మంచి నటి. పలు అవార్డులు ఇటీవలి కాలంలో ఆమెను వెతుక్కుంటూ వచ్చాయి. గ్లామర్‌ అయినా డీ గ్లామర్‌ అయినా కంగనా నటిస్తే, సినిమా హిట్టవ్వాల్సిందే.. విమర్శకుల ప్రశంసలు అందుకోవాల్సిందే. అలా బాలీవుడ్‌లో కంగనా శకం నడుస్తోందిప్పుడు. తెలుగులో 'ఏక్‌ నిరంజన్‌' సినిమాతోనే ఆమె కెరీర్‌ అటకెక్కేసిందనుకోండి.. అది వేరే విషయం. 

అన్నట్టు, 'సిమ్రాన్‌' సినిమాతో కంగనా రనౌత్‌ మరోమారు అవార్డుల్ని కొల్లగొట్టనుందని చిత్ర యూనిట్‌ ధీమా వ్యక్తం చేస్తోంది.