Epaper
ర‌జ‌నీకాంత్ సినిమాలో కీర్తీ సురేష్ న‌టిస్తోందంటూ ఇటీవ‌లే అధికారికంగా ధ్రువీక‌ర‌ణ అయ్యింది. ర‌జ‌నీకాంత్ సినిమాలో న‌టించాల‌నేది త‌న చిర‌కాలం వాంఛ అని అది తీరుతున్నందుకు ఎంతో ఆనందంగా ఉంద‌ని కీర్తీ కూడా ప్ర‌క‌టించింది. ర‌జ‌నీకాంత్ సినిమా కోస‌మ‌ని ఈ హీరోయిన్ మ‌ణిర‌త్నం సినిమా కూడా వ‌దులుకున్న‌ట్టుగా తెలుస్తోంది. ఇలా కీర్తీ సురేష్ కోరుకున్న సినిమా చేస్తోంది కానీ..ఇంత‌కీ ఈ సినిమాలో ఆమె రోల్ ఏమిట‌నేది మాత్రం ఇప్పుడు చ‌ర్చ‌నీయాంశంగా మారుతూ ఉంది.
కీర్తీ సురేష్ ఈ సినిమాలో ర‌జ‌నీకాంత్ కు హీరోయిన్ గా న‌టిస్తోందనే మొద‌ట చాలా మంది అనుకున్నారు. ర‌జ‌నీకాంత్ క‌న్నా కీర్తీ సురేష్ వ‌య‌సులో ఎంతో చిన్న‌ద‌ని వేరే చెప్ప‌న‌క్క‌ర్లేదు. ర‌జ‌నీకాంత్ వ‌య‌సులో స‌గం వ‌య‌సు కూడా ఆమెకు లేదు! అయితే ఇండియ‌న్ సినిమాలో హీరోల‌కు వ‌య‌సు లేదు. డెబ్బై యేళ్ల‌కు ద‌గ్గ‌రైనా వారు తెర మీద వ‌ల‌పు బాణాలు విసురుతూ ఉంటార‌ని వేరే చెప్ప‌న‌క్క‌ర్లేదు.
ఇలాంటి నేపథ్యంలో రజనీ స‌ర‌స‌న కీర్తీ సురేష్ న‌టించినా పెద్ద‌గా ఆశ్చ‌ర్య‌పోయేందుకు ఏమీ లేదు. ఇలాంటివ‌న్నీ రొటీనే. అయితే.. ఈ సినిమాలో కీర్తీ సురేష్ ర‌జ‌నీకాంత్ కు హీరోయిన్ గా న‌టించ‌డం లేద‌నే వార్త‌లు ఇప్పుడు వ‌స్తున్నాయి. ఆమె ఆ సినిమాలో ర‌జ‌నీకాంత్ కు చెల్లెలుగా న‌టించ‌బోతోంద‌నేది ఒక వార్త. అలా కాదు.. ర‌జ‌నీకాంత్ కు కూతురుగా కీర్తీ క‌నిపించ‌బోతోంద‌ని కూడా అంటున్నారు. ఈ సినిమాలో ఖుష్బూ, మీనాలు కూడా న‌టిస్తున్నారు. దీంతో కీర్తీ ర‌జ‌నీకాంత్ కూతుర‌ని అంచ‌నా. ఈ సినిమాలో రజనీ కాంత్ డ‌బుల్ యాక్ష‌న్ అని కూడా తెలుస్తోంది. దీంతో రజనీ స‌ర‌స‌న న‌టించినా పెద్ద‌గా ఆశ్చ‌ర్యం లేదు.