చిరు.. ఎందుకొచ్చిన తలనొప్పి అనుకున్నారా!

మెగాస్టార్ ఖైదీ నెంబర్ 150 ని ప్లాన్ చేసినపుడు, దాన్ని అన్ని విధాలా ప్రమోట్ చేయడానికి తలపెట్టిన కార్యక్రమాల్లో మీలో ఎవరు కోటీశ్వరుడు ఒకటి. మాటీవీలో హీరో నాగార్జున సక్సెస్ ఫుల్ గా నిర్వహించిన ఈ కార్యక్రమాన్ని చిరు తన చేతిలోకి తీసుకున్నారు. తన మిత్రుడు, వ్యాపార భాగస్వామి కోసం నాగ్ త్యాగం చేసారు. ఆ తరువాత ఎమ్ ఇ కే కోసం పలు ప్రోమోలు కూడా తయారుచేసారు. మాటీవీలో ప్రసారం చేసారు. కానీ జనాల నుంచి ఆశించిన స్పందన రాలేదు. నాగ్ ను చూసిన కళ్లతో చిరు ప్రోగ్రామ్ ను చూడలేమనుకున్నారో ఏమో? ఈ కార్యక్రమం ఇదిగో స్టార్ట్ అవుతుంది..అదిగో స్టార్ట్ అవుతుంది అన్నారు. ఇప్పుడు ఏకంగా మరిచిపోయారు. నవంబర్, డిసెంబర్ అయిపోయింది. కొత్త సంవత్సరం వచ్చేస్తోంది. కానీ ప్రోగ్రామ్ జాడలేదు.

దీనికి కారణం మెగాస్టార్ ప్లాన్ మారడమే అని తెలుస్తోంది. ఎమ్ ఇ కే వల్ల తన సినిమాకు బజ్ రాకపోగా, ప్రోగ్రామ్ తేడా చేస్తే, అనవసరపు సమస్యలు అని, దాన్ని పక్కన పెట్టినట్లు వినికిడి. అదే కనుక ఖైదీ విడుదల తరువాత అయితే ఈ హిట్ ఫ్రభావం దాని మీద పడి, ఎమ్ ఇ కె కూడా హిట్ అవుతుందని చెప్పి, తాత్కాలికంగా ఎమ్ ఇ కే ను పక్కన పెట్టించారని తెలుస్తోంది. స్టార్ కు అమ్మేసినా మాటీవీ మీద మెగా, నాగ్ మాటే చెల్లుబాటు అవుతోందనడానికి ఇంతకన్నా నిదర్శనం ఏం కావాలి?