Epaper
మొన్నీమధ్యనే విడుదలైన 'ప్రీ లుక్‌' వివాదాస్పదమయ్యింది. దాంతో, సహజంగానే ఫస్ట్‌ లుక్‌పై అంచనాలు పెరిగిపోతాయి. అంచనాలతోపాటు, వివాదాలూ మామూలేననుకోండి.. అది వేరే విషయం. ఇదంతా ఏ సినిమా గురించి.? అనేదే కదా మీ డౌట్‌.? అప్పుడెప్పుడో రాజేంద్రప్రసాద్‌ ముఖ్యపాత్రలో వచ్చిన 'లేడీస్‌ టైలర్‌' రీమేక్‌ అయిన 'ఫ్యాషన్‌ డిజైనర్‌ సన్‌ ఆఫ్‌ లేడీస్‌ టైలర్‌' గురించే.!
సీనియర్‌ దర్శకుడు వంశీ ఈ చిత్రానికి దర్శకత్వం వహిస్తున్నారు. ఇప్పటిదాకా ఎక్కువగా క్లీన్ సినిమాలే చేసిన సుమంత్‌ అశ్విన్, ఈసారి వివాదాల్లోకెక్కేశాడు అప్పడే. అశ్విన్ సరసన ఈ చిత్రంలో అనీషా ఆంబ్రోస్‌ ఈ చిత్రంలో హీరోయిన్ గా నటిస్తోంది. ఇప్పటికే రిలీజైన ప్రీ లుక్‌లో హీరో – హీరోయిన్‌ని 'టేప్‌తో కొలుస్తుండడాన్ని' చూపించేయడం, దాన్ని పలువురు సినీ ప్రముఖులే సోషల్‌ మీడియాలో ఎండగట్టేయడం తెల్సిన విషయాలే. ఆ మాటకొస్తే, ఈ తరహా 'క్రియేటివిటీ' తెలుగు సినిమాల్లో కొత్తేమీ కాదనుకోండి.. అది వేరే విషయం.
'లేడీస్‌టైలర్‌' సినిమాలోని కొన్ని సీన్స్‌ అప్పట్లో ఓ రేంజ్‌లో హీట్‌ పుట్టించిన విషయం విదితమే. చిలిపితనం హద్దులు దాటినా దాటనట్లే, కామెడీలో కొట్టుకుపోయింది. మరిప్పుడు, ప్రీ లుక్‌తోనే వివాదాల్లోకెక్కిన 'ఫ్యాషన్‌ డిజైనర్‌ సన్‌ ఆఫ్‌ లేడీస్‌ టైలర్‌', ముందు ముందు ఇంకెన్ని వివాదాలకు కేంద్ర బిందువవుతాడో వేచి చూడాల్సిందే. అన్నట్టు, రేపు ఈ సినిమా ఫస్ట్‌ లుక్‌ని విడుదల చేస్తారట.