మారుతి వాట్ నెక్ట్స్: ఏ రూట్లో వెళతాడు?

‘బాబు బంగారం’’ సినిమా విడుదల కానంత వరకూ కూడా మారుతి గురించి ఉత్సాహవంతమైన వార్తలే వచ్చేవి. మారుతి  తో సినిమాకు స్టార్ హీరోలు కూడా సానుకూలంగా ఉన్నారని, రామ్ చరణ్ హీరోగా మారుతి దర్శకత్వంలో ఒక సినిమా రానుందని కూడా అప్పట్లో ప్రచారం జరిగింది. అయితే ఒక్కసారి “బాబు బంగారం’’ విడుదల అయ్యాకా పరిస్థితి మారిపోయింది. దాదాపు ఖాళీ అయిపోయినట్టుగా ఉన్నాడు ఈ దర్శకుడు.

ఒక రకంగా కాదు.. దర్శకుడిగా, రచయితగా, ప్రొడ్యూసర్ గా, కో ప్రొడ్యూసర్ గా.. ఇన్ని రకాల హోదాల్లో యమ బిజీగా ఉన్న మారుతికి సంబంధించి ఇప్పుడు ఫిల్మీ అప్ డేట్స్ ఏమీ వినిపించడం లేదు. చాలా త్వరత్వరగా తనకంటూ ఒక స్కూల్ ను ఏర్పాటు చేసుకుని దానికి హెడ్మాస్టర్ గా మారిన మారుతి.. చేతిలో సినిమాల హడావుడి ఏమీ లేకుండా పోయింది.

“బాబు బంగారం’ డిజాస్టర్ ఏమీ కాకపోయినా.. ఈ దర్శకుడు  వేగం తగ్గడం గమనించాల్సిన అంశం. మరి ఇప్పుడు మారుతి ఏం చేస్తాడు? అనేది ఆసక్తికరమైన అంశమే. మళ్లీ ఎవరైనా స్టార్ హీరో డేట్స్ సంపాదించి సినిమా చేయగలడా? లేక ఎవరైనా చోటా స్టార్లను పెట్టి “ఈ రోజుల్లో’’ “బస్టాప్ ‘’ మార్కు లాంటి సినిమాలతో వస్తాడా.. లేక దర్శకత్వానికి విరామమిచ్చి.. రచయిత కమ్ ప్రొడ్యూసర్ గా వస్తాడో చూడాల్సి ఉంది. అయితే బాబు బంగరానికి కొంచెం ముందు మారుతి కో ప్రొడ్యూసర్ గా వ్యవహరించిన “రోజులు మారాయి’’ సినిమా డిజాస్టర్ అయ్యింది. సో.. ఆ తరహా సినిమాలతో మెప్పించే రోజులు పోయాయేమో అనిపిస్తోంది. సో.. ఓవరాల్ గా ఇది సబ్జెక్టులను ఎంచుకోవడం విషయంలో కూడా ఇది ఇబ్బందికరమైన పరిస్థితే నేమో!