Epaper
కొన్ని కొన్ని కాంబినేషన్లు అలా గుర్తుండిపోతాయి. యాక్షన్ కింగ్ అర్జున్ తెలుగులో చేసిన కాంబినేషన్ సినిమాలు అలాంటివే. జగపతి బాబుతో హనుమాన్ జంక్షన్, రామ్ తో రామ రామ కృష్ణ కృష్ణ, కమల్ హాసన్ తో కలిసి చేసిన ద్రోహి, అలా గుర్తున్న సినిమాలే. ఈ రెండింటికన్నా తెలుగు ప్రేక్షకులకు గుర్తుండిపోయిన సినిమా మరొకటి వుంది.
హీరో నితిన్ కెరీర్ స్టార్ట్ చేసిన తొలినాళ్లలో చేసిన సినిమా అది. డైరక్టర్ కృష్ణ వంశీ అందించిన శ్రీఆంజనేయం. ఈ సినిమాలో యాక్షన్ కింగ్ అర్జున్ ఆంజనేయుడిగా నటించాడు. ఆ సినిమాలో అర్జున్ కు ఎస్పీ బాల సుబ్రహ్మణ్యం డబ్బింగ్ చెప్పడం విశేషం. ఈ సినిమాలో అర్జున్ నటనకు మాంచి ప్రశంసలు లభించాయి అప్పట్లో.
ఆ సినిమా వచ్చిన పుష్కరకాలం తరువాత మళ్లీ నితిన్-అర్జున్ కాంబినేషన్ రిపీట్ అవుతోంది. 2004లో శ్రీఆంజనేయం సినిమా వస్తే, 2017లో లై సినిమా రాబోతోంది. శ్రీఆంజనేయం పూర్తి భక్తిరస చిత్రం అయితే, లై సినిమా పూర్తి యాక్షన్ మూవీ.
ఆ సినిమా నితిన్ నటనలో అ..ఆ దిద్దడం ప్రారంభించినపుడు చేసింది. ఈ సినిమా డిగ్రీ పట్టా పుచ్చేసుకున్నాక చేస్తున్నది. అప్పుడు ఆ సినిమాలో అర్జున్ దగ్గర నితిన్ స్టూడెంట్ లా కనిపిస్తాడు. పాత్ర కూడా అలాగే వుంటుంది. మరి ఈ సినిమాలో ఇద్దరూ పోటా పోటీగా కనిపిస్తున్నారు. చూడాలి ఎలా వుంటుందో ఔట్ పుట్.