పవన్ షో..? ఊ.. ఉత్తుత్తిదేనా?

మీడియా మొఘల్ రామోజీ ఏం చేసినా దాని వెనుక ఓ అర్థం పరమార్థం వుంటుంది. ఎక్కడో చెక్ చెప్పడానికి ఇంకెక్కడో నప్పుళ్లు స్టార్ట్ చేస్తారు.  అమీర్ ఖాన్ సత్యమేవ జయతే టైపులో తెలుగులో షో చేయించాలని ఆయన ఎప్పటి నుంచో అనుకుంటున్నారు. ఇప్పుడు ఈ కార్యక్రమానికి పవన్ కళ్యాణ్ ను ఎంచుకున్నట్లు వార్తలు వెలువడ్డాయి. పవన్ లాంటి రేంజ్ వున్న ఏక్టర్ వుంటే తప్ప ఇలాంటి డ్రై షో లు రక్తికట్టవు.

పైగా దీనికి డైరక్టర్ క్రిష్ కూడా జోడీ కడతారని గుసగుసలు ఒక్కసారిగా గుప్పుమన్నాయి. . అయితే ఈ షో లు ఇప్పట్లో వుండవట. పవన్ చేతిలో వున్న మూడు ప్రాజెక్టులు పూర్తయిన తరువాతే, అది కూడా రాబోయే ఎన్నికలకు కాస్త ముందుగానని వినికిడి. అంటే పవన్ కు జనాల్లో చరిష్మా పెంచడానికి ఈ షోలు ప్లాన్ చేస్తున్నారన్న కామెంట్లు వినిపిస్తున్నాయి. 

అయితే ట్విస్ట్ ఏమిటంటే, ఇదంతా ఊ..ఉత్తుత్తినే అని, ఇలాంటి షోలు ఏవీ క్రిష్ చేయడం లేదని కూడా తెలుస్తోంది. పవన్ సంగతి ఏమో కానీ, క్రిష్ ముందుకు మాత్రం ఇలాంటి ప్రపోజల్ ఏదీ రాలేదట. అసలు పవన్ కు అంత ఓపిక, తీరుబాటు రెండూ వుండవని, అందువల్ల ఇవన్నీ గాలివార్తలే అని కూడా కామెంట్లు వినిపిస్తున్నాయి.