Epaper
రేపు చిరంజీవి పుట్టినరోజు. ఈ నేపథ్యంలో భారీగా వేడుకల్ని ప్లాన్‌ చేశాడు రామ్‌చరణ్‌. చిరంజీవి హీరోగా తెరకెక్కుతున్న 'ఖైదీ నెంబర్‌ 150' సినిమా ఫస్ట్‌ లుక్‌ రేపు విడుదల కానున్న విషయం విదితమే. ఫస్ట్‌ లుక్‌తోపాటు ఓ టీజర్‌ లాంటిది కూడా ప్లాన్‌ చేసినట్లు తెలుస్తోంది. ఇదే వేదికపై చిరంజీవి పుట్టినరోజు వేడుకల్ని కూడా నిర్వహించేస్తారు.
అయితే, చిరంజీవి పుట్టినరోజు వేడుకలకు హాజరు కావాల్సిందిగా పవన్‌కళ్యాణ్‌ని ఇప్పటికే రామ్‌చరణ్‌ స్వయంగా ఆహ్వానించాడు. కానీ, పవన్‌కళ్యాణ్‌ వస్తాడా.? రాడా.? అన్నది మాత్రం మిలియన్‌ డాలర్ల ప్రశ్నే. ఉదయాన్నే చిరంజీవి దగ్గరకు వెళ్ళి, పుట్టినరోజు శుభాకాంక్షలు చెప్పేసి, పవన్‌ వచ్చేస్తాడన్న ప్రచారం జరుగుతోంది. మరోపక్క చిరంజీవి కూడా, పవన్‌కళ్యాణ్‌కి ప్రత్యేక ఆహ్వానం పంపిన దరిమిలా, పవన్‌ – అన్నయ్య పుట్టినరోజు వేడుకలకు హాజరయ్యే అవకాశాలూ లేకపోలేదు.
అన్నయ్య గురించి పవన్‌ అభిమానంతో ఎన్ని మాటలు చెప్పినా, తమ్ముడి గురించి చిరంజీవి ఇంకెంత గొప్పగా చెప్పినా.. ఇద్దరి మధ్యా 'కమ్యూనికేషన్‌ గ్యాప్‌' అలాగే వుండిపోయిందన్న ప్రచారానికి కొదవే లేదు. చిరంజీవి హీరోగా నటిస్తున్న సినిమా అంటే.. అత్యంత ప్రతిష్టాత్మకం. దాదాపు ఎనిమిదేళ్ళ తర్వాత చిరంజీవి హీరోగా నటిస్తున్న సినిమా పట్టాలెక్కింది. సో, ఈ సినిమా ఫస్ట్‌ లుక్‌, వీలైతే టీజర్‌ని పవన్‌కళ్యాణ్‌ చేతుల మీదుగా చేయాలని చరణ్‌ భావిస్తున్నాడు. మరి, చరణ్‌ కోరికని బాబాయ్‌ పవన్‌ తీరుస్తాడా.? వేచి చూడాల్సిందే.