రాజ్+మిక్కీ = ఓ మంచి పాట

మిక్కీ జే మేయర్ అంటే మంచి పాటలకు కేరాఫ్ అడ్రస్. ఏ సినిమా చేసినా పాటలపై అతని ముద్ర కచ్చితంగా వుంటుంది. అయితే చాలా సెలెక్టెడ్ గా చేస్తాడు సినిమాలు. నిర్మాత దిల్ రాజు బ్యానర్ పై శిరీష్ నిర్మించే ఇద్దరిదీ ఒకటే లోకం సినిమాకు లేటెస్ట్ గా పాటలు అందిస్తున్నాడు మిక్కీ. కాస్త గ్యాప్ తరువాత రాజ్ తరుణ్ హీరోగా చేస్తున్న ఈ సినిమాలో ఓ పాట బయటకు వచ్చింది.

నువ్వే.. నువ్వే.. నువ్వే.. నా తోడు నీవే కదా? నీకు నాకు వుందో కథ, ఆ పేరు ప్రేమే కదా? అంటూ సాగే ఈ పాట బాలాజీ రాయగా, అనురాగ్ కులకర్ణి ఆలపించారు. వినగానే పట్టేసేంత క్యాచీగా లేకపోయినా, వినగానే బాగుందిగా అనిపించేలా వుంది ట్యూన్. మిక్కీ రెగ్యులర్ ఇనుస్ట్రుమెంటేషన్ కాకుండా కాస్త వైవిధ్యంగా ప్రయత్నించినట్లు వినిపిస్తోంది.

పాట వినగానే మిక్కీ కదా మ్యూజిక్ అనేయకుండా, ఎవరు మ్యూజిక్ అని అడిగేలా వుంది. మొత్తంమీద చూస్తుంటే రాజ్ తరుణ్ ను మళ్లీ ప్లాట్ ఫారమ్ మీదకు పక్కాగా తీసుకువచ్చేలా వున్నారు నిర్మాత దిల్ రాజు.