రెడ్డిగారి దండయాత్ర కొనసాగింపు.. హిట్ దేక్కనా?

తమిళంలో ‘పాయుంపులి’ పేరుతో రూపొందిన విశాల్ సినిమా తెలుగులో కూడా డబ్ ఖాయమైంది. వచ్చే నెలలో ఈ సినిమా విడుదల కానుంది. తమిళంతో పాటు తెలుగులో కూడా ఇది ఒకేసారి విడుదల కానుంది. దీనికి ‘జయసూర్య’గా నామకరణం చేశారు. ఇందులో విశాల్ పోలీసుగా నటించాడని తెలుస్తోంది. మరి విశాల్ ‘పందెంకోడి’ దగ్గర నుంచి తెలుగువైపు దండయాత్రలు కొనసాగిస్తూనే ఉన్నాడు. 

‘పందెంకోడి’, ‘పొగరు’, ‘సెల్యూట్’ వంటి సినిమాలు పర్వాలేదనిపించిన.. మిగతావి మాత్రం విశాల్‌కు ఏ మాత్రం ఆనందాన్ని ఇవ్వలేదు. ఇటీవల వచ్చిన విశాల్ సినిమా ‘మగమహారాజు’ కొంచెం బెటర్. కనీసం ప్రేక్షకులను నవ్వించింది. మరి ఇప్పుడు మరో మాస్ సబ్జెక్ట్‌తో వస్తున్నాడు విశాల్. గతంలో విశాల్‌తో ‘పాండియనాడు’ అనే సినిమాను తీసిన సుసీంద్రన్ తాజా సినిమాకు దర్శకత్వం వహించాడు.

సుసీంద్రన్ కాన్సెప్టులు డై హార్డ్‌మాస్ సబ్జెక్టులే అయ్యుంటాయి. మరీ అలాంటి సినిమాలను తెలుగు వారు మెచ్చరు. ఇలాంటి నేపథ్యంలో మళ్లీ విశాల్ దండయాత్ర జరుగుతోంది. ఇది ఏ మేరకు విజయవంతం అవుతుందో చూడాలి!