రెండు ఫ్లాపుల తరువాత.. ఆఫీసర్

శివ సినిమాతో వచ్చిన క్రేజ్ తోనే ఇప్పటి దాకా బండి లాగించుకుంటూ వస్తున్న ఆర్జీవీ ఆ తరువాత రెండు సినిమాలు నాగార్జునతో చేసాడు. రెండూ డిజాస్టర్లే. అంతం, గోవిందా గోవిందా సినిమాలు రెండూ బాక్సాఫీస్ దగ్గర బోల్తా కొట్టాయి. ఆ రెండు సినిమాల తరువాత ఇన్నాళ్లకు మళ్లీ అదే కాంబినేషన లో సినిమా వస్తోంది.

నిజానికి అంతం, గోవిందా గోవిందా సినిమాలు తీసినపుడు ఆర్జీవీ పరిస్థితి బాక్సాఫీస్ దగ్గర మరీ అంత దారుణంగా అయితే లేదు. అందువల్ల ఆ సినిమాలకు అప్పట్లో మాంచి బజ్ నే వచ్చింది.

కానీ ఇప్పుడు ఆర్జీవీ పరిస్థితి వేరు. గత రెండు మూడేళ్లలో తీసిన ఒక్కటంటే ఒక్క సినిమాకు బజ్ వస్తే, ఆడితే ఒట్టు. అన్నీ పరమ భయంకరమైన డిజాస్టర్లే. దొరికిన ప్రతి చోటా మోటా హీరోలతో సినిమాలు చేసాడు. ఆఖరికి పోర్నో సినిమా వరకు జారిపోయాడు.

అలాంటి ఆర్జీవీ ఇప్పుడు ఆఫీసర్ అంటూ నాగార్జునతో తీస్తున్న సినిమా లుక్ చూస్తుంటే మళ్లీ లెక్కలో వేసుకోవడానికి మరో సినిమా అన్నట్లు వుంది. ఇంగ్లీష్ లో రాసిన ఇంగ్లీష్ టైటిల్, అసలు ఆఫీసర్ అనే టైటిల్ దగ్గరే తేడా వచ్చేలా వుంది. హిందీ జనాలు తెలుగు డబ్బింగ్ అనుకుని, తెలుగు జనాలు హిందీ డబ్బింగ్ అనుకునే ప్రమాదం కనిపిస్తోందని ఇండస్ట్రీలో వినిపిస్తోంది.

నాగ్ ను ఆ రఫ్, ఓల్డ్ లుక్ లో చూడడానికి ఫ్యామిలీలు ఇష్టపడతాయా? ఎందుకుంటే నాగ్ అంటే ఫ్యామిలీ హీరో. మన్మధుడు అని పేరు. ఇలాంటి ఓల్డ్ లుక్, ఆ తుపాకి, ఇంగ్లీష్ లో రాసిన ఇంగ్లీష్ టైటిల్ అంతా చూస్తుంటే నాగ్-ఆర్జీవీ కలిసి ఏం చేయబోతున్నారో అన్న అనుమానాలు వ్యక్తం అవుతున్నాయి.