సాయిధరమ్ కు విజేత సమస్య?

ఎంతయినా అనుభవం అనుభవమే. కథ మొత్తం విని ఒక్క లైన్ లో కామెంట్ చేసి, కథ చెప్పిన వారిని మారు మాటాడకుండా చేయడం అంటే అనుభవం ఇచ్చిన స్టామినానే కదా? సాయిధరమ్ తేజ్ కథల ఎంపికలో తడబడుతున్నారు. ఈసారి ఇక మామయ్య మెగాస్టార్ కే కథల ఎంపిక బాధ్యత అప్పచెబుతానని చెప్పారు కూడా. కుర్రాడు సరైన హిట్ లేకుండా వున్నాడని, ఆయన కూడా తన మీద వేసుకున్నారు బాధ్యతను.

దీంతో సాయిధరమ్ తేజ తరువాత సినిమా కథ నెరేషన్ ను మెగాస్టార్ కు ఇవ్వాల్సి వచ్చింది. నిర్మాతలు మైత్రి మూవీస్, డైరక్టర్ కిషోర్ తిరుమలకు ఇది తప్పలేదని తెలుస్తోంది. సాయిధరమ్ తేజ్ కోసం కిషోర్ తిరుమల తయారు చేసిన కథను మెగాస్టార్ చిరంజీవికి వినిపించినట్లు తెలుస్తోంది. కథ అంతా విని మెగాస్టార్ చిరంజీవి ఒకటే క్వశ్చను అడిగినట్లు తెలుస్తోంది.

‘విజేత సినిమా చూసారా’ అని. అదేంటీ? అంటే విజేత లైన్ ను ఈ కథ కూడా టచ్ చేస్తోంది అని చెప్పినట్లు ఇండస్ట్రలో గుసగుసలు వినిపిస్తున్నాయి. తండ్రి కొడుకులు అనుబంధం లైన్ నే కిషోర్ తిరుమల కూడా తయారుచేసినట్లు తెలుస్తోంది. దాంతో కథలో మార్పులు చేర్పులు చేసేపనిలో పడినట్లు తెలుస్తోంది. మరింకెన్ని గ్యాసిప్ లు వినిపిస్తాయో ఈ సినిమా గురించి. పైగా సాయిధరమ్ కూడా మరో రెండునెలల దాకా సెట్ మీదకు రావడానికి రెడీగాలేరు కాబట్టి, అంతవరకు కథను చెక్కుకుంటూ వుండొచ్చు.