అరవింద..ఇంకా 43 రోజులు షూటింగ్

అరవింద సమేత వీరరాఘవ. ఎన్టీఆర్-త్రవిక్రమ్ ల కాంబినేషన్. హారిక హాసిని నిర్మాణం. విడుదల తేదీ 11 అక్టోబర్. అంటే సరిగ్గా 65 రోజుల సమయం వుంది. కానీ ఈ సినిమాకు ఇంకా కచ్చితంగా 43రోజులు షూటింగ్ షెడ్యూలు వుందట అంటే, సెప్టెంబర్ 20 నాటికి షూటింగ్ పూర్తవుతుందన్నమాట. ఆ తరువాత ఎడిటింగ్, డబ్బింగ్, రీరికార్డింగ్, డీటీఎస్ మిక్సింగ్ వుండనే వుంటాయి.

అయితే వాటిల్లో కొన్ని సమాంతరంగా కానివ్వడానికి అవకాశం వుంటుంది. డబ్బింగ్, ఎడిటింగ్ కొంతవరకు చేసి, ఆర్ఆర్.కు ఇచ్చేయవచ్చు. అలా అయినా కూడా షూటింగ్ పూర్తయిన తరువాత కనీసం ఓ పది రోజలు పని వుంటుంది. అంటే సెప్టెంబర్ నెలాఖరుకు కానీ ఫస్ట్ కాపీ రెడీకాదు. అక్కడికి విడుదల ఇంకో పదిరోజులు దూరంలో వుంటుంది.

కానీ ఇదంతా ఏమిటి? ఏకబిగిన ఆదివారాలతో సహా పని చేస్తేనే.. ఓ పక్క షూట్ చేస్తూ, మరోపక్క పోస్ట్ ప్రొడక్షన్, టీజర్ కట్, ట్రయిలర్ కట్ వంటి వ్యవహారాలు చేసుకుంటేనే. అందుకే ఇప్పుడు దర్శకుడు త్రివిక్రమ్ వీర బిజీ అయిపోయారట. ఎన్టీఆర్ కాబట్టి ఇంత హెక్టిక్ షెడ్యూలు సాధ్యం అవుతోందని, అదే మరో హీరో అయితే కష్టం అయ్యేదని కూడా వినిపిస్తోంది.