సమ్మర్ ఆడియో ‘బ్యాన్’ దే

భరత్ అనే నేను సినిమా గురించి ఓ ఇంట్రస్టింగ్ విషయం ఇండస్ట్రీలో చక్కర్లు కొడుతోంది. మహేష్ బాబు-కొరటాల శివ కాంబినేషన్ లో తయారవుతున్న సినిమా ఇది. ఈ సినిమాకు సంగీత దర్శకుడు దేవీశ్రీప్రసాద్ అద్భుతమైన ఆడియో ఇచ్చాడన్నది ఆ ఇంట్రస్టింగ్ విషయం.

కొరటాల శివ ఇప్పటి వరకు చేసిన సినిమాలు అన్నీ మ్యూజికల్ గా హిట్ సినిమాలే. మిర్చి, శ్రీమంతుడు, జనతా గ్యారేజ్ మూడింటికి దేవీశ్రీప్రసాద్ అద్భుతమైన ఆల్బమ్ లు ఇచ్చాడు. ఇప్పుడు భరత్ అనే నేను సినిమాకు కూడా అదే రేంజ్ ఆల్బమ్ ఇచ్చాడట.

మహేష్ వైపు నుంచి కొంతమంది ఇండస్ట్రీ సెలబ్రిటీలు, కొరటాలశివ వైపు నుంచి కొంతమంది ఇండస్ట్రీ ప్రముఖులు, దేవీ వైపు నుంచి కొంతమంది సన్నిహితులు ఇప్పటికే ఆల్బమ్ లోని నాలుగు ట్రాక్ లు విన్నారట. విన్నవారంతా సూపర్ గా వచ్చాయి పాటలు అని చెబుతున్నారు.

వాస్తవానికి భరత్ అనే నేను సినిమాకు ఇప్పటికి అంత మరీ గొప్ప బజ్ లేదు. కానీ ఒకసారి పాటలు విడుదల కావడం ప్రారంభిస్తే మాత్రం సినిమాకు ఆడియోనే మంచి బజ్ తీసుకువస్తుందని అంటున్నారు.

మరి సినిమాతో సంబంధంలేని ఇండస్ట్రీ జనాలు పాటల గురించి ఇంతలా చెబుతున్నారంటే, దేవీశ్రీప్రసాద్ చేత కొరటాలశివ ఏ రేంజ్ సాంగ్స్ చేయించుకున్నాడో? తెలియాల్సివుంది. సమ్మర్ లో విడుదలవుతున్న మూడు పెద్ద సినిమాల్లో రెండు దేవీ సంగీతంలో వస్తున్నవే. రెండూ కూడా దేవీ సన్నిహితులైన దర్శకులు రూపొందిస్తున్నవే.