Epaper
అదృష్టం ఎప్పుడు ఏ రూపంలో తలుపు తడుతుందో తెలీదంటారు. అవకాశాల కోసం ఆఫీసుల వెంట తిరిగే నటీనటులు… మేనేజర్లని పెంచి పోషించే వాళ్లు ఎంతో మంది ఉన్నారు. అలాంటిది ట్విట్టర్‌లో ఎవరో తన వీడియో క్లిప్పింగ్‌ని పోస్ట్‌ చేస్తూ ఓ దర్శకుడిని కూడా ఆ ట్వీట్‌కి ట్యాగ్‌ చేస్తే సరాసరి బాలీవుడ్‌ ఆఫర్‌ వచ్చి పడింది ప్రియా బెనర్జీకి.
కిస్‌ అనే చిత్రంతో పరిచయమైన ఎన్నారై ప్రియా బెనర్జీ ఆ తర్వాత జోరులో ముగ్గురు హీరోయిన్లలో ఒకరిగా నటించింది. ఆ రెండు చిత్రాలు ఫ్లాప్‌ అవడంతో ప్రియాకి చెప్పుకోతగ్గ ఆఫర్లేం రావడం లేదు. ఇలాంటి టైమ్‌లో ఆమెకి ఓ బాలీవుడ్‌ సినిమాలో ఆఫర్‌ వచ్చింది. తను ప్రయత్నాలు కూడా చేయకుండానే ఈ ఆఫర్‌ రావడమేంటా అని ఆశ్చర్యపోయిన ప్రియా ఆడిషన్స్‌లో అదరగొట్టేసి అవకాశం దక్కించుకుంది.
దర్శకుడు సంజయ్‌ గుప్తా తన వీడియో క్లిప్‌ ఒకటి ట్విట్టర్‌లో చూసానని, అది చూసి ఇంప్రెస్‌ అవడంతోనే పిలిపించానని ప్రియాకి చెప్పాడట. ఆ వీడియో క్లిప్‌ ట్యాగ్‌ చేసిన వారికి ప్రియా థాంక్స్‌ చెప్తోంది. ఐశ్వర్యారాయ్‌ రీఎంట్రీ ఇస్తోన్న జాజ్‌బా చిత్రంలోనే ఒక కీలక పాత్రకి ప్రియా బెనర్జీ ఎంపికైంది. అనుకోకుండా కలిసివచ్చిన అవకాశం అందలం ఎక్కిస్తుందని ప్రియ నమ్మకం పెట్టుకుంది.