త్రివిక్రమ్..ఊహించని అతిథి

సాధారణంగా అడియో ఫంక్షన్లకు సినిమా జనాలు అందరూ వస్తారు. ఈ మధ్యన ఒక్కో సినిమా ఫంక్షన్ కు ఒక్కోలా ప్లాన్ చేస్తున్నారు. కొన్ని ఫంక్షన్లకు తమకు కావాల్సిన వారిని పిలుస్తున్నారు.కొన్ని పంక్షన్లకు సినిమాతో లింక్ వున్న వాళ్లనే పిలుస్తున్నారు. ఏ ఫంక్షన్ ఎలా వున్నా, ఇలాంటి వాటికి దూరంగా వుండే వాళ్లలో దర్శకుడు త్రివిక్రమ్ శ్రీనివాస్ ఒకరు.

ఆయన చాలా అరుదుగా ఫంక్షన్లకు వస్తుంటారు. అయితే ఆయన సినిమా లేదూ అంటే ఆయన ముఖ్య అతిథిగానో, స్పెషల్ గెస్ట్ గానో వుండే ఫంక్షన్ కు మాత్రమే వస్తుంటారు. అలాంటిది ఆయన ఈ రాత్రి జరిగిన వినయ విధేయ రామ ఫంక్షన్ కు ఊహించని అతిథిగా వచ్చారు. అది కూడా రామ్ చరణ్ తో కలిసి రావడం విశేషం. 

ప్రస్తుతం త్రివిక్రమ్ ఓ కథ అల్లే పనిలో వున్నారు. అది అల్లు అర్జున్ కోసం. పోనీ అలా అని సమీప భవిష్యత్ లో రామ్ చరణ్ తో సినిమా కూడా లేదు. సాధారణంగా ఏదో విషయం లేకుండా సినిమా జనాలు ఇలా చేయరు. అయితే త్రివిక్రమ్ ఓ సినిమాను నిర్మాత డివివి దానయ్యకు చేయాల్సివుంది. ఆ సినిమాను మెగాస్టార్ చిరంజీవి కాంబినేషన్ లో చేస్తారని ఎప్పటి నుంచో వార్తలు వున్నాయి. 

మరి ఈ కనెక్షన్ తో త్రివిక్రమ్ ఈ ఈవెంట్ కు హాజరై వుండొచ్చన్నది జనాల గుసగుస.