వెంకీమామలో కాటమరాయుడు

డిసెంబర్ లో రానున్న ఆసక్తి కలిగించే సినిమాల్లో వెంకీమామ ఒకటి. తొలిసారిగా విక్టరీ వెంకటేష్-నాగ్ చైతన్య కలిసి నటిస్తున్న సినిమా ఇది.

ఇప్పటి వరకు వినిపిస్తున్న సమాచారం ప్రకారం ఈ సినిమా డిసెంబర్ 13న విడుదల అవుతుంది. అయితే సినిమా నిర్మాతల్లో ఒకరైన సురేష్ బాబు ఇంకా ఊగిసలాటలోనే వున్నారని బోగట్టా. 13 బెటర్ నా, 25 బెటర్ నా అనే ఆలోచనలు చేస్తున్నట్లు తెలుస్తోంది. అయితే 13న విడుదల పక్కా అనే వార్తలు కూడా వినవస్తున్నాయి.

ముందుగా డిసెంబర్ 1న అడియో ఫంక్షన్ చేసి, సినిమా విడుదలకు రెండు మూడు రోజుల ముందు ప్రీ రిలీజ్ ఫంక్షన్ చేసి, సినిమాకు బజ్ తేవాలని చూస్తున్నారు.

ఇదిలా వుంటే సినిమాలో విక్టరీ వెంకటేష్ క్యారెక్టర్ ఓ ఇరవై నిమషాల సేపు కాటమరాయుడులో పవన్ క్యారెక్టర్ ను గుర్తు చేస్తుందని టాక్. నడివయసులో వున్న హీరో కాస్తా, హీరోయిన్ పరిచయం కాగానే కాస్త అందం మీద దృష్టి పెట్టడం, ప్రేమ తలపులతో మెలికలు తిరగడం లాంటి వ్యవహారాలు వుంటాయని టాక్.

ఈ మేరకు హీరో వెంకీ మీద ఓ మాంటేజ్ సాంగ్ కూడా ఫన్నీగా పిక్చరైజ్ చేసినట్లు తెలుస్తోంది. వాస్తవానికి ఈ సాంగ్ ను విలేజ్ నాచురల్ లోకేషన్లలో పిక్చరైజ్ చేద్దాం అనుకున్నారు కానీ, మళ్లీ సెట్ వేసి తీసినట్లు తెలుస్తోంది. కాటమరాయుడులో శృతి-పవన్ మధ్య సీన్లు మాదిరిగా, ఇందులో వెంకీ-పాయల్ మధ్య సీన్లు వుంటాయని టాక్.