విజయ్ దొరికేసినట్లేనా ఆర్జీవీకి?

విజయ్ దేవరకొండ లేటెస్ట్ మూవీ అర్జున్ రెడ్డి విజయంలో వివాదాస్పద డైరక్టర్ రామ్ గోపాల్ వర్మ ప్రమేయం కూడా ఎంతో కొంత వుంది. ఆ సినిమాను వెనకేసుకు రావడం, విజయ్ ను పొగిడే పనిలో పనిగా మిగిలిన హీరోలపై చతుర్లు విసరడం ఇలా చాలా చేసారు.

ఇలా అన్నీ చేసినందుకు ఫలితం బాగానే కిట్టినట్లు టాక్ వినిపిస్తోంది. విజయ్ దేవరకొండ ఇప్పుడున్న సినిమాలు ఫినిష్ అయిన తరువాత రామ్ గోపాల్ వర్మతో ఓ సినిమా చేస్తానని మాట ఇచ్చినట్లు గుసగుసలు వినిపిస్తున్నాయి.

ప్రస్తుతం విజయ్ దేవరకొండ చేతిలో రెండు మూడు ప్రాజెక్టులు వున్నాయి. అవి పూర్తయ్యే వరకు మరే అడ్వాన్స్ లు తీసుకోనని ఫిక్స్ అయ్యాడు. అయితే ఇటీవల ఆర్జీవీని విజయ్ మర్యాదపూర్వకంగా కలిసినట్లు, ఆ టైమ్ లో ఆర్జీవీ కోరిక మేరకు కలిసి ఓ సినిమా చేద్దామని విజయ్ మాటిచ్చారని గుసగుసలు వినిపిస్తున్నాయి. అంటే ఈ సినిమాతో మళ్లీ మరోసారి ఆర్జీవీ తెలుగు సినిమా రంగంలోకి ప్రవేశిస్తారన్నమాట.

గతంలోనే యంగ్ హీరో రాజ్ తరుణ్ తో సినిమా చేయాలని ఆర్జీవీ ప్రయత్నాలు చేసినట్లు వినికిడి. రాజ్ తరుణ్ ను ఓసారి ముంబాయి కూడా పిలిపించుకున్నాడు ఆర్జీవీ. కానీ చాలా జాగ్రత్తగా రాజ్ తరుణ్ తప్పుకున్నాడు. ఆర్జీవీతో సినిమా అంటే ఎలా వుంటుందో గడచిన మూడు నాలుగేళ్లుగా అనేకానేక సినిమాలు చెప్పకనే చెబుతాయి.