విష్ణు స్కూలులో దేవాన్ష్

మంచు విష్ణు నటుడిగా వుంటూనే విద్యాసంస్థల విషయంలో చాలా కీలకంగా వ్యవహరిస్తున్నారు. ఒక పక్క స్ప్రింగ్ బోర్డు చైన్ స్కూళ్లు, విద్యానికేతన్ ఇంజనీరింగ్ కాలేజీలు ఇలా చాలావున్నాయి. అన్నింటికన్నా జస్ట్ ఒకటి రెండేళ్ల క్రితం జూబ్లీ హిల్స్ లో స్టార్ట్ చేసిన కిడ్స్ కార్నర్ ఓ ప్రత్యేకత సాధిస్తోంది. హైదరాబాద్ లోని హై ఫై కుటుంబాల పిల్లలంతా ఈ ప్లే స్కూలులోనే వుంటున్నారు.

పవర్ స్టార్ పవన్ కళ్యాణ్ కుమార్తె ఈ ప్లే స్కూలులోనే చదువుతోంది. ఇప్పుడు ఇదే స్కూలులో మరో సెలబ్రిటీ చేరుతున్నట్లు విశ్వసనీయ వర్గాల బోగట్టా. అది మరెవరో కాదు, ఆంధ్ర ముఖ్యమంత్రి చంద్రబాబు నాయుడి మనుమడు దేవాన్ష్. ఆంధ్ర ఐటి మంత్రి లోకేష్, హెరిటేజ్ డైరక్టర్ నారా బ్రాహ్మిణిల కుమారుడు.

మంచు విష్ణు సారథ్యంలో వున్న ఈ స్కూలు వెనుక బ్రెయిన్ అండ్ మేనేజ్మెంట్ అంతా విష్ణు భార్య వెరోనికా దేనట. వెరోనికా ఎవరో కాదు. వైఎస్ జగన్ కు సోదరి. వైఎస్ రాజశేఖర రెడ్డి సోదరుడి కుమార్తే. అంటే వైఎస్ సంబంధీకులు నడిపే స్కూలులో బాబుగారి మనుమడు అన్నమాట. భలే గమ్మత్తుగా వుంది కదా? రాజకీయాల్లోకి వచ్చిన కొత్తలో వైఎస్-చంద్రబాబు మంచి స్నేహితులు. ఆ తరువాత రాను రాను శతృవులుగా మారారు.