బన్నీకి సెగ.. అలా చల్లారుస్తారంట!

ప్రస్తుతం అల్లు అర్జున్ పై తెలుగు రాష్ట్రాల్లో ఓ రేంజ్ లో ట్రోలింగ్ నడుస్తోంది. ఇటు పవన్ అభిమానులు, అటు జనసేన కార్యకర్తలు, కొంతమంది నేతలు, మధ్యలో మెగాభిమానులు.. ఇలా అందరూ కలిసి బన్నీని టార్గెట్ చేశారు.

ఈ వివాదాన్ని మరింత ముందుకు తీసుకెళ్తూ.. డిసెంబర్ 6న పుష్ప-2ను గన్నవరం నియోజకవర్గంలో రిలీజ్ చేయనివ్వం అంటూ సవాళ్లు కూడా విసురుతున్నారు. మొత్తానికి అటుఇటు తిరిగి ఈ వివాదం పుష్ప-2కు చుట్టుకునేలా ఉంది. కాదు..కాదు.. చుట్టుకునేలా చేస్తున్నారు కొంతమంది.

అదే జరిగితే పుష్పతో వచ్చిన క్రేజ్ ను పుష్ప-2తో బన్నీ కోల్పోయే ప్రమాదం ఉంది. ఈ సినిమాతో పలు రికార్డులపై అతడు కన్నేశాడు. మరీ ముఖ్యంగా పాన్ ఇండియా రికార్డులు అతడి దృష్టిలో ఉన్నాయి.

మరి ఈ ప్రమాదం నుంచి పుష్ప-2ను గట్టెక్కించడం ఎలా? ప్రస్తుతం ఆ దిశగానే అల్లు కాంపౌండ్ లో మేధోమధనం జరుగుతుంది. అటువైపు నుంచి అల్లు కుటుంబానికి దగ్గరగా ఉన్న ఏకైక వ్యక్తి బాలకృష్ణ మాత్రమే. అతడి నుంచి సమస్యను సామరస్యంగా పరిష్కరించుకోవాలని చూస్తున్నారట.

ముందుగా ఓ సెలబ్రేషన్…

త్వరలోనే బాలకృష్ణ 50 ఏళ్ల కెరీర్ ను గ్రాండ్ గా సెలబ్రేట్ చేయబోతున్నారు. ఈ సంబరాల కోసం చాలామంది ప్రముఖుల్ని ఆహ్వానించారు. ఇటు చిరంజీవికి కూడా ఆహ్వానం అందింది, అటు అల్లు అర్జున్ ను కూడా ఆహ్వానించారు. ఈ గోల్డెన్ జూబ్లీ సెలబ్రేషన్స్ లో చిరంజీవి, అల్లు అర్జున్ ను పక్కపక్కన కూర్చోబెట్టాలనేది అల్లు అరవింద్ ప్లాన్. అలా బన్నీపై ఉన్న హీట్ ను కాస్త చల్లార్చొచ్చని భావిస్తున్నారు.

ఆ తర్వాత ‘ఆహా’..

ఇక ప్లాన్-బి కూడా ఉంది. ఈసారి కూడా బాలకృష్ణతోనే పని. అన్ స్టాపబుల్ కొత్త సీజన్ షురూ కాబోతున్న సంగతి తెలిసిందే. సరిగ్గా పుష్ప-2 విడుదలకు ముందు బాలయ్య-బన్నీతో ఫుల్ ఫన్ తో ఓ ఎపిసోడ్ సెట్ చేసి వదలాలని చూస్తున్నారట. స్వయంగా బాలయ్య రంగంలోకి దిగితే కూటమి నేతలు, మరీ ముఖ్యంగా జనసేన నేతలు కాస్త చల్లారే అవకాశం ఉందని భావిస్తున్నారు.

వీటిలో మొదటి ప్లాన్ వర్కవుట్ అవుతుందా లేదా చెప్పలేం కానీ, ప్లాన్-బి మాత్రం అల్లు అరవింద్ చేతిలో పని. పైగా బాలయ్య-బన్నీతో ఇప్పటికే ఓ సీజన్ లో ముఖాముఖి పూర్తిచేశారు. కాబట్టి మరోసారి ఇద్దర్నీ కూర్చోబెట్టడం పెద్ద సమస్య కాదు.

ఇవి కాకుండా, మరో 2-3 ప్లాన్స్ కూడా అనుకుంటున్నారట. వీటిలో ఏది వర్కవుట్ అవుతుందో చూడాలి. ఎలాగైనా పుష్ప-2 రిలీజ్ వరకు అందర్నీ కూల్ చేయాలి. ఆ తర్వాత సంగతి తర్వాత చూసుకుందాం అనే దోరణిలో ఉన్నారంతా.