Epaper
వాలంటైన్స్ డే కానుకగా రేపు రిలీజ్ చేయాల్సిన సర్కారువారి పాట తొలి లిరికల్ వీడియోను ఈరోజే విడుదల చేస్తున్నారు. దీనికి కారణం అందరికీ తెలిసిందే. ఊహించని విధంగా నిన్న ఈ లిరికల్ వీడియో లీక్ అయింది. చాలామంది సోషల్ మీడియాలో చూసేశారు కూడా. దీంతో నష్ట నివారణ చర్యల్లో భాగంగా ఒక రోజు ముందే కళావతి సాంగ్ ను రిలీజ్ చేస్తున్నారు.
కళావతి అనే లిరిక్స్ తో సాగే ఈ పాట కోసం భారీ సెట్ వేశారు. మ్యూజిక్ డైరక్టర్, సింగర్ తో పాటు ఇతర కళాకారులంతా సంప్రదాయ దుస్తుల్లో రెడీ అయి షూట్ చేసిన వీడియో ఇది. ఎప్పట్లానే తమన్ కూర్చొని పియానో వాయిస్తుండగా.. పక్కనే ఉన్న స్టూల్ పై సిద్ శ్రీరామ్ కూర్చొని పాట పాడాడు. దీనికి తోడు మధ్యమధ్యలో మహేష్ బాబు, కీర్తిసురేష్ ఫొటోల్ని చూపించారు.
ఉన్నంతలో ఈ లిరికల్ వీడియోలో హైలెట్ ఏంటంటే.. మహేష్ బాబు వేసిన ఓ స్టెప్ ను ఇందులో ఉంచారు. టోటల్ వీడియోకు ఇది హైలెట్ గా నిలుస్తుంది. కాకపోతే స్టెప్ లో కొత్తదనం లేదు, మహేష్ బాబు మార్క్ ఉందంతే.
కళావతి సాంగ్ కు సంబంధించి విడుదల చేసిన ప్రోమో సోషల్ మీడియాలో వైరల్ అయింది. యూట్యూబ్ ట్రెండింగ్ లో నిన్నంతా నంబర్ వన్ స్థానంలో నడిచింది. ఇప్పటికే లీకైన లిరికల్ వీడియో ఆ స్థాయిలో క్లిక్ అవుతుందా అనే అనుమానం అందర్లో ఉంది. మరోవైపు మైత్రీ మూవీ మేకర్స్ పై ట్రోలింగ్ మాత్రం ఆగడం లేదు.