ఓటీటీపై కన్నేసిన స్టార్ డైరక్టర్?

ప్రస్తుతం తెలుగులో స్టార్ డైరక్టర్ హోదాలో ఉన్నాడు కొరటాల. అతడితో సినిమాలు చేసేందుకు దాదాపు హీరోలంతా సిద్ధం. కానీ కొరటాల శివ ఆలోచనలు మాత్రం మరోలా ఉన్నాయి. ఓటీటీ కోసం ఈ దర్శకుడు కొన్ని కథలు సిద్ధం చేస్తున్నట్టు తెలుస్తోంది. మరీ ముఖ్యంగా ఓటీటీ కోసం తనకు బాగా తెలిసిన కొంతమంది దర్శకులతో ఓ గ్రూప్ ను తయారుచేశాడు కొరటాల.

ప్రస్తుతం కొరటాల గైడెన్స్ లో కొంతమంది దర్శకులు ఓటీటీ కోసం కథలు సిద్ధం చేస్తున్నారు. ఓటీటీ సంస్థల నుంచి అనుమతి వచ్చిన తర్వాత స్వయంగా కొరటాల నిర్మాతగా మారి, సదరు దర్శకుడితో ఆ సినిమాను తెరకెక్కించే ఆలోచన చేస్తున్నాడట.

ప్రస్తుతం ఆచార్య పోస్ట్ ప్రొడక్షన్ పనుల్లో బిజీగా ఉన్నాడు కొరటాల. దీంతో పాటు ఎన్టీఆర్ తో చేయబోయే సినిమాపై కూడా గట్టిగా దృష్టిపెట్టాడు. ఇలా రెండు బడా ప్రాజెక్టులను హ్యాండిల్ చేస్తూనే, మరోవైపు ఓటీటీ కథలపై కూడా వర్క్ చేస్తున్నాడట ఈ స్టార్ డైరక్టర్.

టాలీవుడ్ నుంచి చాలామంది దర్శకులు ఇప్పటికే ఓటీటీలో అడుగుపెట్టారు. కానీ కొరటాల లాంటి స్టార్ డైరక్టర్స్ మాత్రం ఇంతవరకు ఓటీటీలో అడుగుపెట్టలేదు. కొరటాల రాకతో టాలీవుడ్ కు సంబంధించి ఓటీటీ ఈక్వేషన్స్ మారుతాయేమో చూడాలి.