Epaper
బాలయ్య వారసుడిగా మోక్షజ్ఞ ఎంట్రీ అదిగో ఇదిగోనంటూ వార్తలొస్తున్నాయి కానీ అబ్బాయిగారిని మాత్రం ఎందుకో కనీసం జనం ముందుకి కూడా రానీయకుండా దాచిపెడుతున్నారు బాలకృష్ణ. అప్పుడెప్పుడో ఓ గుడిలో కార్యక్రమం కోసం బైటకి రావడంతో మోక్షజ్ఞ ఫిజిక్ పై దారుణమైన కామెంట్లు పడ్డాయి. ఇదిగో ఇప్పుడు బాలకృష్ణ పుట్టినరోజు సందర్భంగా మరోసారి మోక్షజ్ఞ హాట్ టాపిక్ అయ్యాడు.
ఇప్పుడున్న ఫిజిక్ తో మోక్షజ్ఞ హీరోగా ఎంట్రీ ఇవ్వడం కుదరదని తేల్చి చెప్పేస్తున్నారు నందమూరి అభిమానులు. అసలు హీరోయిక్ మెటీరియల్ ఉంటే.. ఏనాడో చైల్డ్ ఆర్టిస్ట్ గా తెరపైకి వచ్చేవాడే. మహేష్ బాబు కానీ, జూనియర్ ఎన్టీఆర్ కానీ.. అలా పువ్వు పుట్టగానే పరిమళించినవారే. లేటెస్ట్ గా మహేష్ తనయుడు గౌతమ్, రవితేజ కొడుకు మహాధన్.. చిన్నప్పుడే కెమెరా ముందుకొచ్చే ధైర్యం చేస్తున్నారు.
కాస్తో కూస్తో ట్రైనింగ్ అవసరం అనుకున్నప్పుడే.. రామ్ చరణ్, అల్లు అర్జున్ లాగ తెరకు పరిచయమయ్యే వరకు వారిని మీడియా కంటపడకుండా దాచిపెడతారు పెద్దవాళ్లు. ఆ తర్వాత సొంత టాలెంటే వారికి పనికొస్తుందనుకోండి. అది వేరే విషయం. కానీ మోక్షజ్ఞ విషయంలో ఇవేవీ జరుగుతున్నట్టు కనిపించడం లేదు. ఛైల్డ్ ఆర్టిస్టుగా కనిపించలేదు. అలాఅని ట్రయినింగ్ తీసుకుంటున్నట్టు కూడా కనిపించడం లేదు. చూస్తోంటే మోక్షజ్ఞలో పెద్దగా ఫైర్ ఉన్నట్టు కనిపించడం లేదు.
ఎందుకో మోక్షజ్ఞ విషయంలో బాలయ్య కాస్త జంకుతున్నట్టు కనిపిస్తోంది. తాజా ఫొటోలు చూస్తే.. అచ్చం నారా లోకేష్ లాగానే ఉన్నాడని సెటైర్లు పేలుతున్నాయి. అక్కాతమ్ముళ్ల పిల్లలు కాబట్టి ఆమాత్రం పోలికలుండటం సహజం. పర్సనాల్టీ, అమాయకత్వం అన్నిట్లో మోక్షజ్ఞ, లోకేష్ నే గుర్తుకు తెస్తున్నాడని అంటున్నారు నెటిజన్లు. మనోడి వాక్చాతుర్యం కూడా ఇంచుమించు అలాగే ఉండొచ్చు.
ఈ ఏడాది, వచ్చే ఏడాది కూడా కొడుకు సిల్వర్ స్క్రీన్ ఎంట్రీ ఉండదని బాలయ్య ప్రకటించాడంటే.. మోక్షజ్ఞ ఇంకా ఏ స్థాయిలో ఉన్నాడో అర్థం చేసుకోవచ్చు. అంతేకాదు.. బాడీ బిల్డింగ్ చేస్తున్నాడంటూ గతంలో వచ్చిన వార్తలు కూడా అబద్ధాలని తాజా ఫొటోలతో తేలిపోయాయి. మొత్తానికి మోక్షజ్ఞకు ట్రయినింగ్, మేకోవర్ చాలా అవసరమనే విషయం తేలిపోయింది. ఆ తర్వాత ఆయన సినిమాల్లోకి వస్తే.. అప్పుడు తేలుతుంది మనోడు లోకేష్ కి పోటీయా లేక జూనియర్ ఎన్టీఆర్ కి పోటీయా అనేది. ప్రస్తుతానికి మోక్షజ్ఞ వాలకం చూస్తుంటే మాత్రం కచ్చితంగా లోకేష్ కే పోటీ ఇచ్చేట్టున్నాడు.