ఈమధ్య కాలంలో ఇదే చిన్న సినిమా

నిఖిల్ హీరోగా నటించిన సినిమా ‘అప్పుడో ఇప్పుడు ఎప్పుడో’. టైటిల్ కు తగ్గట్టే ఈ సినిమా అప్పుడెప్పుడో షూటింగ్ పూర్తిచేసుకుంది. ఎప్పుడో రిలీజ్ అవ్వాల్సింది. కానీ ఇప్పుడు ఉన్నఫలంగా ఊడిపడింది. ఈ 8వ తేదీన సినిమాను రిలీజ్ చేస్తున్నారు.

కేవలం సినిమా విడుదల విషయంలోనే కాదు, ప్రచారంలో కూడా టైటిల్ కు తగ్గట్టే వ్యవహరిస్తోంది యూనిట్. అప్పుడోసారి, ఇప్పుడోసారి ప్రమోషన్స్ చేస్తున్నారు. తాజాగా నిఖిల్ ఈ సినిమా ప్రమోషన్స్ కోసం తొలిసారి కెమెరా ముందుకొచ్చాడు.

తన ఇంటర్వ్యూలో చాలా ఆసక్తికర విషయాన్ని బయటపెట్టాడు నిఖిల్. ‘అప్పుడో ఇప్పుడు ఎప్పుడో’ సినిమా రన్ టైమ్ కేవలం 2 గంటలు మాత్రమే. కాస్త ఆశ్చర్యంగా అనిపించినా ఇదే నిజం. తమ సినిమా 2 గంటల్లో అయిపోతుందని, ఆ 2 గంటలు మంచి అనుభూతిని ఇస్తామంటున్నాడు.

ఎంటర్ టైన్ మెంట్ అందించడమే తమ ప్రధాన ఉద్దేశం అయినప్పటికీ.. ఈ సినిమాతో కొన్ని ప్రయోగాలు చేస్తున్నట్టు వెల్లడించాడు నిఖిల్. ప్రయోగాత్మక స్క్రీన్ ప్లే మూవీగా దీన్ని చెప్పుకొస్తున్నాడు. సుధీర్ వర్మ ఈ సినిమాకు దర్శకుడు.