Epaper
ప్రేమికుల కోసం ప్రేమికుల రోజున తన ప్రేమపాటను విడుదల చేశాడు నితిన్. చాలామంది ఎదరుచూస్తున్న భీష్మ సినిమా నుంచి సింగిల్స్ ఏంథెమ్ కొద్దిసేపటి కిందట విడుదలైంది. ఆడియో ఇప్పటికే విడుదలకాగా.. ఇప్పుడు వీడియోతో కూడా ఈ పాట ఆకట్టుకుంది.
రకరకాల గెటప్స్ లో నితిన్ ఈ సాంగ్ లో కనిపిస్తున్నాడు. ప్రేమ కోసం పరితపించే అతడి పాత్రను ఈ పాటలో ఎలివేట్ చేశారు. వయసొచ్చింది కానీ ఇంకా సింగిల్ గానే ఉన్నానని, తనకు కూడా ఓ గర్ల్ ఫ్రెండ్ కావాలంటూ నితిన్ సాంగేసుకున్నాడు. ఈ క్రమంలో నితిన్ గెటప్స్ బాగా ఎట్రాక్ట్ చేస్తున్నాయి.
పాత తరానికి చెందిన చిరంజీవి లుక్, శోభన్ బాబు లుక్ తో పాటు ఖుషి సినిమాలో పాపులర్ అయిన టెంపుల్ సీన్ ను కూడా ఈ సాంగ్ లో ఫన్నీగా చూపించారు. అటుఇటుగా 2 నిమిషాల నిడివి ఉన్న ఈ పాటలో నితిన్ గెటప్స్, స్టెప్స్ ఎట్రాక్ట్ చేస్తున్నాయి. మహతి స్వరసాగర్ కంపోజ్ చేసిన ఈ పాటను అనురాగ్ కులకర్ణి ఆలపించాడు.
అయితే చిన్న నిరాశ ఏంటంటే.. ప్రేమికుల రోజున నితిన్-రష్మిక సాంగ్ ను రిలీజ్ చేస్తారని అంతా భావించారు. సింగిల్స్ ఏంథెమ్ వస్తోందని ముందే చెప్పినా అందులో రష్మిక కూడా ఉంటుందని చాలామంది ఊహించారు. కానీ అలా జరగలేదు. నితిన్-రష్మిక కాంబోలో మరో వీడియో, మరో రోజున రాబోతోంది. ఫిబ్రవరి 21న థియేటర్లలోకి వస్తున్నాడు భీష్మ.