Epaper
ఏ రోజుకు అయినా జాతీయ అవార్డును పొంద‌డ‌మే టార్గెట్ అంటోంది నిత్యామీన‌న్. క‌మ‌ర్షియ‌ల్ సినిమాల్లో న‌టించే ప్ర‌తిభావంత‌మైన న‌టీమ‌ణుల్లో నిత్యామీన‌న్ నిలుస్తోంది. చైల్డ్ ఆర్టిస్ట్ గా కెరీర్ ప్రారంభించిన ఈ మ‌ల‌యాళీ తెలుగు సినీ ప్రియుల‌ను ప్ర‌త్యేకంగా ఆక‌ట్టుకుంది. తెలుగు వాళ్లు హీరోయిన్ల‌లో కోరుకునే ఫీచ‌ర్లేమీ లేక‌పోయినా.. నిత్య మాత్రం స‌క్సెస్ అయ్యింది. ప‌దేళ్ల నుంచి ఇక్క‌డ హీరోయిన్ గా కొన‌సాగుతూ ఉంది.
ఇటీవ‌లే బాలీవుడ్ ఎంట్రీ కూడా ఇచ్చింది. మిష‌న్ మంగ‌ళ్ తో అక్క‌డ గుర్తింపును సొంతం చేసుకుంది. అయితే ఇప్ప‌టి వ‌ర‌కూ నిత్యా మీన‌న్ కు తీర‌ని కోరిక ఒక‌టేన‌ట. అది జాతీయ అవార్డు. దాన్ని సాధించ‌డ‌మే ల‌క్ష్యం అని అంటోందామె.
త‌న‌కు ఇంకా కెరీర్ మిగిలే ఉంద‌ని, త‌న క‌థ అప్పుడే అయిపోలేద‌ని.. ముందు ముందు అనేక సినిమాలు చేసే అవ‌కాశం ఉంది కాబ‌ట్టి, వాటిలో దేనితో అయినా త‌ను జాతీయ అవార్డును సొంతం చేసుకోవ‌డం ఖాయ‌మ‌ని నిత్యామీన‌న్ కాన్ఫిడెంట్ గా చెబుతూ ఉంది. మంచి క‌థ‌లున్న సినిమాలను ఎంచుకుంటున్న‌ట్టుగా చెబుతోంది.
మ‌రి అవార్డులు కావాలంటే.. ఈ హీరోయిన్ క‌మ‌ర్షియ‌ల్ సినిమాల‌కు వీడ్కోలు చెప్పాలేమో! ప్యారల‌ల్ సినిమాల వైపు అడుగేయాలేమో. అయినా ఇప్పుడు అలాంటి సినిమాలు తీస్తున్న ప్రొడ్యూస‌ర్లు కూడా పెద్ద‌గా క‌నిపించ‌డం లేదాయె. క‌మ‌ర్షియ‌ల్ సినిమాల్లోనే కాస్త భిన్న ప్ర‌య‌త్నాల‌కు జాతీయ అవార్డులు ద‌క్కుతున్నాయి. వాటిల్లో నిత్య పేరెప్పుడు వినిపిస్తుందో!